Фото: Халқ сўзи

Шу йилнинг 8–13 ноябрь кунлари Фарғона вилоятида Ўзбекистонда илк бор “Аҳмад ал-Фарғоний” номидаги халқаро физика олимпиадаси бўлиб ўтади.

Унда дунёнинг 18 давлатидан 140 нафардан зиёд 15-17 ёшли ўқувчилар иштирок этади. Олимпиада баҳсларида 6 та давлат - Қирғизистон, Уммон, Қозоғистон, Тожикистон, Россия, Ўзбекистон каби давлатлар вакиллари офлайн, қолган мамлакатлар ўқувчи ёшлари эса онлайн тарзда қатнашади.

Бугун тадбир қатншачилари Фарғона шаҳрида улуғ аждодимиз Аҳмад ал- Фарғонийга ўрнатилган ҳайкал пойига гул қўйгач, Ислом Каримов номидаги вилоят Театр-концерт саройида олимпиаданинг тантанали очилиш маросими ўтказилди.

Олимпиада – бу интеллектуал мусобақа, куч ва билимни синаш имконияти,-деди тадбирда сўзга чиққан Ўзбекистон Республикаси халқ таълим вазири Шерзод Шерматов. - Унда энг билимли ва иқтидорлилар ёшлар сараланади. Халқаро физика олимпиадаси Аҳмад ал-Фарғоний номи билан боғланиши бежиз эмас. Мусобақани ўтказиш учун Марказий Осиё давлатлари орасида биринчи бўлиб Фарғона вилояти танлангани нақадар қувонарлидир.

Ботир Мадиёров, “Халқ сўзи”.