Эрондаги норозилик намойишлари давомида икки кунда қарийб 30 минг одам ҳалок бўлган бўлиши мумкин. Бу ҳақида «TIme» журналига таяниб BILD нашри маълум қилди.

Эрон соғлиқни сақлаш вазирлигининг икки расмийси журналга берган маълумотларига кўра, 8 ва 9 январь кунлари Эрон кўчаларида 30 минг нафар одам ҳалок бўлган бўлиши мумкин. Уларнинг сўзларига кўра, намойишчиларнинг ўлими кўлами давлатнинг жасадларни олиб кетиш имкониятларидан ошиб кетган.

Шунингдек, жасадларни олиб кетишга мўлжалланган махсус сумкалари етарли бўлмаган ҳамда тез ёрдам машиналари ўрнига юк машиналари ишлатилган. Эрон ҳукуматининг ҳалок бўлганлар бўйича тақдим қилган маълумотлари, интернетда тарқалган маълумотлардан сезиларли даражада фарқ қилади.

Расмий Теҳрон 21 январь куни 3 минг 117 кишининг ҳалок бўлгани ҳақида маълумот берган эди. АҚШда жойлашган Инсон ҳуқуқлари фаоллари янгиликлар агентлиги 5 минг 459 кишининг ҳалок бўлгани ҳақида хабар берган. Яна 17 мингдан ортиқ шундай ҳолатлар ўрганилмоқда.

Германияда яшаётган эронлик офтальмолог Амир Параста томонидан эълон қилинган таҳлил маълумотларга кўра, атиги икки кун ичида 30 минг 304 та ўлим ҳолати қайт этилган. Ҳарбий касалхоналар ва ўликхоналарга етказилган жасадлар бундан мустасно, дейилади офтальмолог таҳлилида.