Фото: «Башакшеҳир» / Instagram

Хабарингиз бор, ёзги трансферлар ойнаси давомида Ўзбекистон терма жамоаси сардори Элдор Шомуродов Италиянинг «Рома» клубидан Туркиянинг «Истанбул Башакшеҳир» жамоасига ижарага берилди. Элдор ушбу трансфердан кейин жамоасининг асосий ҳужумчисига айлана оладими? Бугун шу саволга жавоб қидирамиз.

Ўтган йили «Башакшеҳир» жамоасининг ҳужум чизиғида қуйидаги футболчилар ўйнади:

Кшиштоф Пёнтек – 33 та ўйин, 21 та гол;

Жоау Фигуэйреду – 34 та ўйин, 7 та гол;

Филип Кенни – 27 та ўйин, 4 та гол.

– Лекин бу йигитларнинг бирортаси ҳозир жамоада эмас. «Милан» жамоасининг собиқ футболчиси Пёнтек Қатарнинг «Ал-Дуҳайл» клубига 10 миллион евро эвазига трансфер қилинган.

– Яқинда Малайзия фуқаролигини қабул қилган Жоау Фигуэйреду эса айнан шу мамлакат шарафини ҳимоя қиладиган «Жоҳор Дарул Тазим» жамоасига кўчиб ўтган.

– Сенегаллик футболчи Филип Кенни эса айни вақтда эркин агент.

Марказий ҳужумни кучайтириш учун «Башакшеҳир» Элдор Шомуродовдан ташқари яна 2 та футболчи билан шартнома имзолади. Улар:

Дэви Зельке – «Гамбург» жамоасидан эркин агент сифатида келиб қўшилган. 30 ёшда. Ўтган мавсум жамоаси сафида 31 та ўйинда майдонга тушиб 22 та гол урган ҳолда иккинчи Бундеслиганинг энг яхши тўпурари бўлган. «Transfermarkt» портали 3,5 миллион еврога баҳоламоқда.

Нуну да Кошта – Туркия чемпионати вакили «Қосимпоша» клубидан эркин агент сифатида келиб қўшилган. 34 ёшда. Ўтган мавсум жамоаси сафида 29 та ўйинда майдонга тушиб 13 та гол урган. «Transfermarkt» портали 600 минг еврога баҳоламоқда.

Шунингдек, «Башакшеҳир»да 2 нафар туркиялик марказий ҳужумчилар ҳам кўзга ташланмоқда. Улар ўтган мавсумни «Мугласпор»да ижара асосида ўтказган Муҳаммед Арсланташ ва «Анадолу Уни» клубидан қайтган Эфечан Барлик.

Энди жамоа ўйини ҳақида тўхталсак: «Башакшеҳир» асосан 3-5-2 тактикасида ўйнайдиган жамоа. Демак, кўп эҳтимол ўйинларда 2 та марказий ҳужумчи майдонга туширилади. Шундан келиб чиққан ҳолда жамоанинг асосий ҳужумчилари Зельке ва Шомуродов бўлса ажабмас. Лекин Нунуни Туркия чемпионатида тажрибаси бор эканлиги кишини ўйлантирмоқда.

Хулоса қилсак, Элдорнинг янги жамоасидаги асосий марказий ҳужумчи бўлиш учун имкониятлари етарли. Фақатгина футболчимиз ўз салоҳиятини кўрсата олса, бас.

Муҳаммадамин Зуҳриддинов тайёрлади.