Фото: t.me/V_Zelenskiy_official

Украина Вашингтон томонидан таклиф қилинган тинчлик режасидаги талабларга нисбатан ўз альтернативаларини таклиф қилган ҳолда, урушни тугатишга қаратилган режа устида АҚШ ва бошқа ҳамкорлар билан иш олиб боради. Бу ҳақда Украина президенти Владимир Зеленский маълум қилди.

Зеленскийнинг таъкидлашича, бугун Украина ўз тарихидаги энг оғир даврлардан бирини бошдан кечирмоқда ва жуда қийин қарорлар қаршисида қолиши мумкин.

— Ёки қадр-қимматдан айрилиш, ёки асосий ҳамкорни йўқотиш хавфи. Ёки 28 бандни қабул қилиш, ёки энг оғир — можаросиз, музли ва хавфли қиш. Эркинлик, қадр-қиммат ва адолатсиз ҳаёт. Ва бизга икки марта ҳужум қилган томонга ишонишимизни кутиш. Биздан жавоб кутилмоқда, — деди у Қадр-қиммат ва озодлик куни муносабати билан украиналикларга йўллаган мурожаатида.

Украина раҳбари таъкидлашича, Киев баландпарвоз баёнотлар бермайди, балки Вашингтон ва бошқа шериклар билан тинчлик режаси юзасидан хотиржам ва изчил ишлайди.

— Бош мавзумиз ҳамкор билан конструктив ечимларни излаш бўлади. Мен далиллар келтираман, ишонтириб айтаман, альтернативлар таклиф қиламан. Лекин, аниқки, биз душманга Украина тинчликни истамаяпти, жараённи бузмоқда ёки дипломатияга тайёр эмас, деган баҳона беришга йўл қўймаймиз. Бу ҳеч қачон бўлмайди, — деди Зеленский.

Владимир Зеленскийнинг айтишича, у режадаги барча бандлар орасида камида иккиси — украиналикларнинг қадр-қиммати ва озодлиги — эътибордан четда қолмаслиги учун курашади.

— Чунки айнан шу асосда қолган барча нарса қурилган: мустақиллигимиз, суверенитетимиз, еримиз, халқимиз ва Украина келажаги. Биз уруш тугаши учун ва Украина, Европа ҳамда глобал тинчлик барқарор бўлиши учун барча ишни қилишимиз керак ва қиламиз, — деди у.

Украина президенти Европа иттифоқи мамлакатлари ёрдамига умид боғлаётганини ҳам қайд этди.

— Биз Россия узоқда эмас, айнан ЕИ чегаралари ёнида эканини яхши тушунадиган европалик дўстларимизга суянамиз, — деди Зеленский.

Шунингдек, Зеленский келаси ҳафта «жуда оғир» ва «ҳодисаларга бой» бўлишини қўшимча қилди. Унинг айтишича, бу даврда украиналикларни бўлиб-ажратишга қаратилган ахборот ва сиёсий босим уринишлари кўпаяди. Президент фуқароларни бирдам бўлишга чақирди.

Аввалроқ Украина Олий Радаси депутати Алексей Гончаренко АҚШ томонидан таклиф қилинган тинчлик режасининг матнини эълон қилган эди. У 28 бандини ўз ичига олади. Улар орасида — Украинанинг НАТОга киришдан воз кечиши, келишув имзоланганидан 100 кун ўтгач сайловлар ўтказиш, Қрим, Луганск ва Донецкнинг амалда Россияга тегишли эканини тан олиш каби талаблар ҳам бор.