АҚШ ва Украина мамлакатни тиклаш бўйича қиймати 800 миллиард долларга тенг бўлган келишувни тузиши мумкин. Бу ҳақда The Telegraph нашри хабар бермоқда.

Нашр суҳбатдошларининг маълум қилишича, келишувни 19–23 январь кунлари ўтадиган Давосдаги Жаҳон иқтисодий форумида имзолаш режалаштирилган. Айни форум доирасида АҚШ президенти Дональд Трамп ва Украина раҳбари Владимир Зеленскийнинг учрашуви бўлиб ўтиши кутилмоқда.

Зеленский мазкур келишувни, жумладан хавфсизлик масалаларини ҳам қамраб олган ҳолда, Оқ уйда муҳокама қилишни режалаштирган эди. Бироқ Европа ҳамкорлари учрашувни айнан форум майдонида ўтказишни таклиф қилган.

Режага кўра, 10 йил мобайнида кредитлар, грантлар ҳамда хусусий компаниялар инвестициялари орқали тахминан 800 миллиард доллар жалб этилиши кўзда тутилган. Украина ҳукумати АҚШнинг мамлакат иқтисодиётини тиклашдаги иштирокини Вашингтон томонидан хавфсизлик кафолатлари тақдим этилиши эҳтимолини оширади, деб ҳисобламоқда.

Кутилмоқдаки, ушбу дастурга дунёдаги энг йирик инвестиция гуруҳи ҳисобланган BlackRock ҳам қўшилади. Келишув тафсилотлари ҳозирча ошкор этилмаган.