Кеча Тошкент вилоятида жойлашган «Дўстлик» стадионида 20 ёшгача бўлган қизлар ўртасидаги Осиё чемпионати мусобақаси саралашининг G гуруҳида баҳслар якунланди.

Сўнгги турда Владимир Панов бошчилигидаги Ўзбекистон U-20 терма жамоаси Иордания терма жамоаси билан куч синашди.

Регламентга кўра, Осиё кубогининг финал босқичига ўз гуруҳида ғалаба қозонган 8 та жамоа ва энг яхши натижага эга 3 та 2-ўрин соҳиблари чиқишади. Сўнгги тур олдидан Иордания U-20 қизлар термаси ҳам, Ўзбекистон U-20 қизлар жамоаси ҳам 6 тадан очко бор эди. Лекин 2 та ўйинда 16 та тўп киритиб, ўз дарвозаси дахлсизлигини сақлаб қолган термамиз, айнан шу кўрсаткичга кўра гуруҳда 1-ўринда турарди.

Демак, сўнгги турда Иорданияни ғалаба, термамизни эса дуранг ва ғалаба қаноатлантирар эди. Лекин ўйин олдидан бошқа гуруҳлардан энг кўп очко тўплаган 2-ўрин соҳиблари 6 тадан баллга эга бўлишгани маълум бўлди. Бу дегани Ўзбекистон U-20 ва Иордания U-20 терма жамоалари ўртасидаги ўйинда дуранг қайд этилиши, икки жамоани ҳам кейинги босқичга чиқишини англатарди. Амалда ҳам шундай бўлди.

Ўйиннинг 42-дақиқасида иорданиялик футболчи Ал-Зурикат узоқ масофадан чиройли гол уриб, ҳисобни очди. 45+3 дақиқада эса Диёра Баxtиёрова бурчакдан узатилган тўпни рақиб дарвозасига йўллаб ҳисобни тенглаштирди.

Иккинчи таймнинг 61-дақиқасида араблар иккинчи голини урди. Бу голга Асалхон Аминжонова ва Меҳрибон Эгамбердиева чиройли гўллари билан жавоб қайтаришди.

Энди ҳамма ғалабани нишонлайман деб турган пайт иорданиялик футболчи мувозанатни тиклади. Шу тариқа баҳс 3:3 ҳисоби билан якунланди. Шу тариқа ҳар икки жамоа Осиё кубоги масаласини ижобий ҳал этди.

Ўйиндан кейин бирданига ҳар икки жамоа вакиллари стадионга югуриб чиқиб ғалабани нишонлаб кетишди. Бунақаси футболда камдан-кам бўладиган ҳолат эди.

Ўйиндан кейин терма жамоамизнинг қатор футболчилари «Халқ сўзи» нашриёти учун интервью берди.

«Ўйин жуда қийин ўтди. Биринчи таймда яхши ўйнай олмадик. Иккинчи таймда ўзимизга келиб, ўйин тақдирини ҳал эта олдик. Осиё кубогига чиққанимиздан хурсандмиз. Насиб этса Жаҳон чемпионатига ҳам чиқамиз», — деб айтиб ўтди терма жамоамиз ҳимоячиси Меруерт Раҳматуллаева.

«Бугун бизга қўллаб-қувватлаган барчага раҳмат айтаман. Ўйин қийин ўтди. Бироқ мухлисларнинг чорлови билан ўйинда керакли натижага эриша олдик. Бу ўйинда гол уриб, жамоага ёрдам беришни жуда хоҳлаган эдим. Мана, Осиё чемпионатига чиқиб олдик. Энди Жаҳон чемпионати сари ҳаракат қиламиз», — деди учинчи гол муаллифи Меҳрибон Эгамбердиева.

«Қийин ўйин ўтказдик. Ўтган ўйинда кичик жароҳатим сабаб ўйнамаган эдим. Бугун майдонга тушдим. Жамоалар кучи деярли тенг эди. Шу сабаб жуда қизиқ ўйин бўлди. Биз иккинчи ўрин билан ҳам мусобақага чиқишимиз аниқ эканини билардик. Аммо шундай бўлса ҳам биринчи ўринга ҳаракат қилдик ва айнан биринчи ўрин билан мусобақага йўл олмоқдамиз. Бундан жуда хурсандман», — деб таъкидлади иккинчи таймда ўйинга қўшилган Ойдиноy Тургунова.

Эслатиб ўтамиз, U-20 Осиё чемпионати келгуси йилнинг 1–18 апрель кунлари Таиланд мамлакатида бўлиб ўтади. Ушбу турнирда кучли тўртлик ўрин олган жамоалар Польшада бўлиб ўтадиган U-20 Жаҳон чемпионатига йўл олишади.

Муҳаммадамин Зухриддинов тайёрлади.