Фото: AP

Хитойда 30 миллиондан ортиқ одам "COVID-19"нинг янги тўлқинининг тез тарқалиши сабабли карантин остида қолди. Бу ҳақда "Daily Mail" хабар бермоқда.

Манбага кўра, 15 март куни Хитойнинг расмий эпидемиология назорати органлари инфекциянинг 5280 та янги ҳолатини қайд этган. Бу бир ҳафта аввалги кўрсаткичдан бир неча баравар кўп.

Шу боис Чангчун ва Шенчжен каби йирик шаҳарлар маъмуриятларида локдаун ва аҳолининг ҳаракатланишига чекловлар жорий этилгани эълон қилинди. Хитойнинг энг йирик шаҳри Шанхай маъмурияти ҳозирча тўлиқ блокировкага эҳтиёж йўқлигини билдирган. Аммо бир ҳудуддан бошқасига кириш ва чиқишда жиддий чекловлар жорий қилган. Бундан ташқари, Шанхай ва Пекинга келиши керак бўлган ўнлаб халқаро рейслар 1 майга қадар ўз йўналишини мамлакатнинг бошқа шаҳарларига ўзгартиради.

Дастлабки маълумотларга кўра, беморларнинг аксариятида "Stealth Omicron" штамми билан аниқланмоқда. Бу "Omicron" штаммининг янада юқумли вариантидир.

Аввалроқ, Жаҳон соғлиқни сақлаш ташкилоти "COVID-19" пандемияси 2022 йил охиригача тугашини кутилаётганини маълум қилган эди.