Фото: Олий Мажлис Сенати ахборот хизмати

Жорий йилнинг 15 июнь куни Ўзбекистон Республикаси Олий Мажлиси Сенати Раиси, Одам савдосига ва мажбурий меҳнатга қарши курашиш миллий комиссияси раиси Танзила Нарбаева ташриф доирасида АҚШнинг Европада хавфсизлик ва ҳамкорлик бўйича комиссиясининг (Хелсинки комиссияси) катта сиёсий маслаҳатчиси Женис Хелвиг билан учрашди.

Учрашувда бир қатор муҳим масалалар муҳокама қилинди. Шу жумладан, Ўзбекистоннинг сўнгги йилларда мажбурий меҳнат ва болалар меҳнатига барҳам бериш соҳасидаги катта ютуқларига эътибор қаратилди.

Бу борада Хелсинки комиссияси вакили одам савдосига қарши курашиш ва гендер масалалари билан шуғулланувчи, шунингдек, Марказий Осиё билан ишлаш борасида 25 йиллик тажрибага эга бўлган мутахассис сифатида “Cotton Campaign” халқаро коалицияси томонидан ўзбек пахтасига қўйилган бойкот бекор қилингани ҳам муҳим воқеа эканлигини айтиб ўтди.

Шунингдек, Ж.Хелвиг Ўзбекистоннинг ЕХҲТ, айниқса Демократик институтлар ва инсон ҳуқуқлари бўйича бюроси (ДИИҲБ) билан алоқалари барқарорлигига урғу берди. У мамлакатда ЕХҲТ тавсиялари ва бош принципларини татбиқ этиш давом эттирилишига умид билдирди.