Янги ва замонавий русумдаги автомобиллар учун равон йўллар керак. Кафтдек текис ҳамда давлат стандартлари талабига мос барпо қилинган йўллар транспорт воситалари умрини узайтиради, манзилга бехавотир ва тез етиб олишингизга имконият яратади. Шу жиҳатдан юртимизда иқтисодиётнинг қон томири ҳисобланган йўлсозлик соҳасига эътибор кучайтирилмоқда. Бу саъй-ҳаракатлар ҳудудларни боғловчи трассалардан тортиб, маҳаллий йўлларгача бўлган ўзгаришларда ўз аксини топмоқда. Бугун барпо этилаётган кенг ва равон, зарур инфратузилмага эга замонавий йўллар Ватанимизнинг 34 йиллик қутлуғ тўйи арафасида узукка кўз қўйгандай ярашиб турибди.

— Йўлларнинг равонлиги бу халқимиз фаровонлигининг рамзи,— дейди Наманган вилоят автомобиль йўллари бош бошқармаси бошлиғи Дилшодбек Сайфиддинов.— Энг улуғ, энг азиз байрамимиз арафасида йўллар ҳақида сўз очмоқ савоблидир. Чунки йўллар бизнинг ўзимиз мақсад қилган улуғ манзиллар сари чорлайди. Эътибор беринг, вилоятимизда умумий фойдаланилаётган 3229 километр автомобиль йўллари бўлиб, уларни теп-текис ҳолда сақлаш, жорий таъмирлаш ва атрофини кўкаламзорлаштириш доимий назоратимизда. Айтиш керакки, кейинги йилларда йўлсозликда замонавий андозаларга ўтилди. Бунинг учун зарур бўлган замонавий машина ва механизмлар олиб келинмоқда. Қурилиш ва таъмирлаш ишларига илғор технология кириб келяпти. Аҳолининг энг кўп эътирози ички йўллар муаммоси билан боғлиқ. Тўғри, одамларни қийнаб келган қишда лой, ёзда чанг йўллар бор ва уларга файз киритиш борасидаги ишларимиз жадал суръатда давом этмоқда. Масалан, ўтган йилнинг ўзида биргина “Ташаббусли бюджет” доирасида ғолиб чиққан маҳаллаларнинг 564 километр узунликдаги ички йўлларига асфальт ётқизиб берилди.

Йирик лойиҳалардан бири — “Пунгон-Наманган” автомобиль йўли қайта қурилмоқда. Халқаро аҳамиятга эга бу трассани бугунги кун талабларига мос тарзда барпо этиш ишлари давом этмоқда. Мамлакатимиз пойтахтини водий билан боғловчи “Фарғона ҳалқа йўли”нинг бир қисми бўлган мазкур трассада айни пайтда бир кеча-кундузда ўртача 20 мингдан зиёд транспорт воситалари қатнамоқда. Кейинги пайтларда ҳаракат оқимининг жадал ортиши натижасида унинг ўтказиш қобилияти пасая бошлади. Албатта, бундай ҳолат тирбандликларни юзага келтириши табиий. Шундан келиб чиқиб 75 километр масофадаги йўлни реконструкция қилиш бўйича лойиҳа ишлаб чиқилди. Ўтган йили ижросига киришилган 368 миллион доллар қийматидаги ушбу лойиҳа Хитойнинг “CITIC Construction” компанияси томонидан амалга оширилмоқда.

      “Молиялаштириш-лойиҳалаш-қуриш” тамойилига асосланган автойўлни реконструкциялаш ишлари тўрт йилга мўлжалланган бўлиб, айни жараёнда қатнов тартибини икки тасмалидан тўрт тасмали цемент бетон қопламага ўтказиш, юк кўтариш қобилиятини амалдаги 10 тоннадан 13 тоннага ошириш, транспорт воситалари кунлик ҳаракат жадаллигини ўртача 40 мингтага етказиш кўзда тутилган.

Бошқа бир лойиҳа эса “Наманган шаҳри — Учқўрғон” автомобиль йўлини реконструкция қилишга йўналтирилган. Уйчи тумани орқали Учқўрғон ва Норин туманларини вилоят маркази билан боғловчи 17,5 километр масофада янги йўналиш бўйича қайта қуриш режалаштирилган ушбу объектнинг умумий қиймати 184 миллиард сўмни ташкил этади. Лойиҳада доирасида кўприк қурилиши ҳам кўзда тутилган бўлиб, айни пайтда унинг бошланғич шакл-шамойили кўзга ташланиб қолди.

Сафарнинг бехатар бўлиши йўлларнинг равонлиги билан чамбарчас боғлиқ. Бунда транспорт воситалари ҳаракатига пиёдаларнинг халақит бермаслигига ҳам аҳамият қаратиш керак. Наманган шаҳрининг Сардоба даҳасида барпо этилаётган осма кўприк айни мақсадга хизмат қилади. Уни қуриш ҳудудда жойлашган катта бозор ёнидаги тирбандликни бартараф этиш заруратидан келиб чиққан. Узунлиги 38, эни 3 ва асосий йўлдан баландлиги 6 метрни ташкил қиладиган иншоотни жорий йил охирига қадар битказиш кўзда тутилмоқда.

Халқимиз орасида “йўл қурмоқ савоб”, деган ажойиб нақл юради. Бу — бежизга айтилмаган. Чунки йўл иқтисодиётимизнинг қон томири, элларни, дилларни ва кўнгилларни бирлаштирувчи муҳим восита. Қайси мамлакатда йўллар кафтдек текис ва замонавий асосда барпо этилган бўлса, ўша юртда тараққиёт илдам одимлаётган бўлади. Буни юртимиздаги дилни яйратадиган мисоли қора тасмадек бири-биридан силлиқ ва текис трассалар мисолида яққол кузатиш мумкин. Йўлларимизнинг ободлиги инсон қадрини улуғлашнинг бир кўриниши ва ҳаётимиз фаровонлиги тимсоли, десак сира муболаға эмас. Зеро, Янги Ўзбекистонга айнан шу йўллар орқали борилади.                                               

Қудратилла НАЖМИДДИНОВ,

“Халқ сўзи”.