Фарҳод ЭСОНОВ/«Халқ сўзи». Ўттиз уч йил муқаддам бунёд этилган мактабда қўшимча икки қаватли замонавий бино қурилиб фойдаланишга топширилди.

Сурхондарё вилоятининг Бойсун туманидаги Юқори Мачай маҳалласи пурвиқор тоғ қўйнида жойлашган. У туманнинг энг чекка қишлоқларидан. Тоғ қўйнидаги болалар замонавий мактабдан баҳраманд бўлишлари — ростдан бу қувончли хабар!

— Бундан 33 йил олдин ҳудудимизда кичкина мактаб қурилган эди, — дейди маҳалла нуронийси Менглимамат Ахмедов. — Аҳоли йил сайин ўсяпти. Мактаб ёшидаги ўғил-қизларимизнинг сони 652 нафарга етди. Мактаб синфхоналарининг етишмаслигидан дарс машғулотлари икки босқичда бўлиб ўтилаётганди. Ҳатто баъзи оилалар фарзандлари 6 километр олисдаги мактабга ҳам қатнаётганди. Энди бу қийинчиликлар ортда қолди.

Тоғли ҳудудларда яшовчи болалар учун замонавий мактаблар қад ростлаётгани мамлакатимизда таълим тизимининг ривожланиши ва барча болалар учун тенг имконият яратишга қаратилган муҳим ислоҳотлардан. Бунинг натижасида болаларнинг таълим олиш даражаси ошиб, уларнинг келажакдаги имкониятлари кенгаяди ва жамиятнинг ривожланишига ўз ҳиссаларини қўшади.

Ушбу мактаб биноси 140 ўринга мўлжалланган бўлиб, инвестиция дастури асосида «Муқтадир Ихтисос таъмир» хусусий корхонаси томонидан қиймати 2 млрд. 700 млн. сўм пул маблағлари эвазига қуриб битказилди.