Фото: Anadolu

Бирлашган Миллатлар Ташкилотининг Фаластин ҳудуди бўйича мустақил халқаро тергов комиссияси Исроилнинг Ғазодаги ҳаракатларини геноцид деб топди.

Исроил ҳукумати Ғазо секторида гуруҳ сифатида фаластинликларнинг репродуктив қобилиятини қисман йўқ қилди, жумладан, туғилишнинг олдини олишга қаратилган чора-тадбирларни қўллади ва Рим статутида ва Геноцид жиноятининг олдини олиш ва жазолаш тўғрисидаги конвенцияда («Геноцид конвенцияси») геноциднинг асосий актлари бўлган гуруҳ сифатида фаластинликларни жисмоний йўқ қилиш учун ҳисобланган яшаш шароитларини атайлаб яратдилар”, дейилади комиссия ҳисоботида.

Комиссиянинг асосий хулосалари
Исроил Ғазо секторида геноцид қилишда давом этмоқда, унинг аҳолига қарши ҳаракатлари 1948 йилдан бери энг шафқатсизи ҳисобланади.

Буни мамлакатнинг ҳарбий ва сиёсий раҳбарлари, жумладан, Бош вазир Бенямин Нетаньяҳу қўзғатди.

Тел-Авив анклав аҳолисига қарши геноциднинг олдини ололмагани учун жавобгарликни ўз зиммасига олади.

Давлатлар Исроил мудофаа кучларининг Ғазо ва босиб олинган ҳудудлардаги ҳаракатларини тўхтатиш учун барча воситалардан фойдаланишга мажбур.

Шу билан бирга, Исроил Ташқи ишлар вазирлиги БМТ ҳисоботини рад этиб, у «ҲАМАС ёлғонлари»га асосланганини билдирди. Вазирлик, шунингдек, халқаро комиссияни тарқатиб юборишга чақирди.

Исроилнинг Ғазога ҳужуми
Нетаняьҳу шу йилнинг 21 август куни Ғазо устидан назорат ўрнатиш ва ҲАМАСни мағлуб этиш режаларини тасдиқлади. У «хавфсизлик периметрини таъминлаш» учун анклавни босиб олиш ва кейинчалик уни фуқаролик ҳукуматига топшириш нияти ҳақида гапирди.

Душанба куни кечқурун Исроил мудофаа кучлари Ғазога ҳужум бошлади, шаҳар катта бомбардимонларга учради. Аввал Исроил ҳаво кучлари шаҳарга зарба берди, кейин танклар кириб келди. Оммавий ахборот воситаларида бир неча ўнлаб фаластинликлар ҳалок бўлгани ҳақида хабар берилган.

Шу билан бирга, Исроил раҳбарияти Нетаньяҳуни операциядан воз кечишга чақирди, чунки бу шаҳардаги исроиллик гаровга олинганларнинг ҳаётига хавф туғдиради, ҲАМАСни йўқ қилиш даргумон ва Исроил мудофаа кучлари ўртасида катта талофатларга олиб келади.

Операция бошлангандан кейин гаровга олинганларнинг оилалари Исроил ҳужумларида яқинларининг ҳалок бўлишидан қўрқиб, Қуддусдаги Бош вазирнинг қароргоҳи олдида намойиш ўтказди.

«Axios» порталининг ёзишича, АҚШ Давлат котиби Марко Рубио Исроил операциясини қўллаб-қувватлаган, бироқ уни имкон қадар тезроқ якунлашга чақирган.

Олдинроқ, Европа Иттифоқининг ташқи ишлар ва хавфсизлик сиёсати бўйича Олий вакили Кая Каллас Европа Иттифоқи Ғазода содир бўлаётган воқеаларни тўхтата олмаслигини, чунки Америка Қўшма Штатлари Исроил расмийларининг ҳаракатларини қатъий қўллаб-қувватлашини айтганди.

Анклавда очлик
Сўнгги ойларда Тел-Авив Ғазо сектори блокадасини кучайтирди ва у ерга керакли ҳажмдаги озиқ-овқат ва дори-дармон етказиб берилишига тўсқинлик қилмоқда. Бу аллақачон аҳоли орасида тўйиб овқатланмаслик қурбонларига олиб келди. Бирлашган Миллатлар Ташкилотининг Озиқ-овқат ва қишлоқ хўжалиги ташкилоти бу ҳудудда биринчи марта ҳалокатли очарчилик ҳолатини эълон қилди.

Бунгача БМТ очарчиликнинг максимал босқичини икки марта тасдиқлаган: 2017 йилда Жанубий Суданда ва 2011 йилда Сомалида.

Ғазо маъмурияти маълумотларига кўра, 2023 йилнинг 7 октябридан бери Исроил ҳужумлари оқибатида ҳалок бўлганлар сони 64 мингдан ошган. Уларнинг асосий қисми тинч аҳоли вакиллари ҳисобланади.