Сирдарё вилоятида “Беш ташаббус олимпиадаси” доирасидаги танлов ва мусобақаларда иштирок этишни истаганлар йил сайин кўпайиб бормоқда. Жорий йилда мазкур беллашувларда қатнашиш учун жами 286 891 нафар ёш онлайн платформа орқали рўйхатдан ўтгани ҳам шундан далолат беради.

— Бугунги кунга қадар “Беш ташаббус олимпиадаси” доирасида “Ёш китобхон оила” танловининг туман-шаҳарлар босқичи, “Заковат” интеллектуал ўйинлари, “Ёш мусаввирлар” ва “Моҳир фортепианочи” танловларининг вилоят босқичлари ўтказилди, — дейди Сирдарё вилояти ёшлар ишлари бошқармаси масъул ходими Шуҳратжон Ҳасанов. — Маълумки, ҳозиргача спортнинг бир қанча турлари бўйича мусобақалар ва “Ёшлар овози” танловининг республика финал босқичи якунланди. Вилоятимиз ёшлари шу бугунга қадар ўтган танлов ва мусобақаларнинг республика босқичида муносиб иштирок этиб, жами 33 та — 8 та олтин, 12 та кумуш ва 13 та бронза медалларни қўлга киритди.

Маълумот учун, жорий йилда “Ёш китобхон” танловининг республика босқичида Боёвут туманидаги Сармич маҳалласида яшовчи Шаҳнозабону Муродова 15-19 ёш тоифасида иккинчи ўринни эгаллади. Янгиер шаҳрининг Жомий номли маҳалласи футбол жамоаси эса “Давлат хавфсизлик хизмати кубоги” учун ўтказилган футбол мусобақасининг республика босқичида ғалаба қозониб, 1-ўрин соҳиби бўлди.

Аҳмадали ШЕРНАЗАРОВ

«Халқ сўзи».