Айни кунларда Беларусь Республикасида «Ўзбекистон маданияти кунлари» доирасидаги тадбирлар давом этмоқда. Ана шундай тадбирлардан бири — Слуцк шаҳридаги «Маданият уйи»да юқори савияда ўтказилди.

Юртимиз санъат усталари иштирокидаги ушбу тадбирда Ўзбекистон халқ артистлари, халқаро ва республика танловлари совриндорлари, Юнус Ражабий номидаги Мақом ансамбли хонандалари, «Шодлик» ашула ва рақс ансамбли созанда ҳамда раққосалари ўз чиқишларини намойиш этишди.

Тақдим қилинган концерт дастури ранг-баранг бўлиб, унда нафақат ўзбек, балки беларусь халқининг куй-қўшиқлари ҳамда жаҳон классик опера асарлари санъаткорларимиз томонидан юксак маҳорат билан ижро қилинди.

Хусусан, «Муножот», «Ўзбекистоним», «Мустаҳзод», «Мавриги», «Бахшиёна», «Лазги», «Белоруссия», «Купалинка», «Герцог қўшиғи», «Испанча балеро», шунингдек, «Сурнай навоси», «Доира завқи» каби мусиқий композициялар олқишлар билан кутиб олинди.

Мезбон мамлакат вакиллари ушбу концерт дастури орқали маданиятимиз ва санъатимиз ҳақида янада кенгроқ тасаввурга эга бўлиб, унутилмас таассурот олганликларини эътироф этдилар.