Франция пойтахтида ўтказилаётган ёзги Олимпиада ўйинларида ўзбек спортчилари ўз юришларини давом эттирмоқда.

Бугундан «Париж-2024» ёзги Олимпия ўйинлари доирасида енгил атлетикачиларимиз баҳсларга киришишади. Кун давомида 4 спорт турида 9 нафар атлетимиз иштирок этишади.

Олимпиаданинг еттинчи куни ҳам дзюдо баҳслари билан бошланади. Ушбу спорт туридаги сўнгги курашчимиз Алишер Юсупов соат 13:00 дан кейин татамига чиқиши режалаштирилган. Спортчимиз +100 кг вазн тоифасида иштирок этади.

Бугундан енгил атлетикачиларимиз ҳам ўз юришларини бошлайди. Сафина Саъдуллаева баландликка сакраш баҳсларига соат 13:15дан қўшилса, орадан 6 соат ўтиб, Шарифа Давронова уч ҳатлаб сакраш бўйича ўз иштирокини бошлаб олади.

Камондан отиш бўйича эса микст, яъни жуфтликдаги баҳслар бошланади. 14:25 дан кейин Амирхон Содиқов ва Зиёдахон Абдусатторовалар жуфтликда ўз кучини синаб кўришади.

Бокс баҳслари эса бугун жуда қизғин ўтиши кутилмоқда. Аёллар ўртасида -57 кг вазн тоифасида юртимиз шарафини ҳимоя қилаётган Ситора Бобоқулова 18:30 да рингга кўтарилса, 20:30 да чемпионликка асосий даъвогарлардан Баҳодир Жалолов рақибини синовдан ўтказади.

Тошкент вақти билан 3 августнинг илк соатида яна икки боксчимиз рингга чиқади. Булар -51 кг вазнда Ҳасанбой Дўсматов ва -80 кг вазнда Тўрабек Ҳабибуллаевлардир.

«Халқ сўзи» спортчиларимизга омад ва муваффақият тилайди.

Аввалроқ, Руслан Абдуллаев ўзининг биринчи Олимпиадасида ҳакамларнинг тушунарсиз қарорлар ортидан турнирни тарк этганди.