Ўзбекистонлик супероғир вазн тоифасидаги боксчи Баҳодир Жалолов профессионал рингдаги 16-ғалабасини қўлга киритди. У фаолиятида илк бор Россияда жанг ўтказди.

Жалолов кеча, 6 октябрь куни Санкт-Петербург шаҳрида бўлиб ўтган “IBA Pro 10” турнири марказий жангида россиялик Виталий Кудухов устидан ишончли ғалабага эришди.

Тўлиқ 8 раунд давом этган жангда ҳамюртимиз устунликни қўлдан бермади ва ҳакамлар бир овоздан уни ғолиб деб топди — 77–73, 77–74, 78–72. Бу натижа Жалоловнинг профессионал рекордини 16–0 (14 KO) кўрсаткичига етказди. Ушбу ғалаба Баҳодирнинг қийин эришилган зафарларидан бири бўлди дейиш мумкин.

Жалолов ҳозиргача рингда мағлубият нималигини билмай келмоқда. Унинг профессионал фаолиятидаги муҳим ғалабалар орасида Крис Томпсон (1-раундда нокаут), Оноредэ Эхвареме (1-раунд), Куртис Харпер (4-раунд) ва Жек Малувайи (8-раунд) устидан қозонган зафарлари ҳам бор.

Шунингдек, у 2025 йил апрель ойидаги жангда Игор Шевадзутскийни очколар бўйича енгган эди. Санкт-Петербургдаги бу сўнгги жанг эса Жалолов учун Россия рингларидаги илк ғалаба бўлди ва у профессионал боксдаги йирик беллашувларга яна бир қадам яқинлашди.