Болтабой БЕКМАТОВ

АРАФА

Бир тантана содир бўлажак,

Бир тараддуд кезиб юрибди.

Мийиғида кулимсираган

Қуёш буни сезиб юрибди.

Новдаларнинг юзида сепкил,

Дарахтлар ҳам бир тараддудда.

Сезилар бир ажиб ҳаяжон

Йўл четида, каллакдор тутда.

Нами қочган тўнка устида

Кукулашар бир жуфт кабутар.

Ана, ҳовуз ичра фаввора

Ҳозир буюк сирин фош этар.

Кезар недир қилиб овоза,

Тилсиз жарчи баҳор еллари.

Сиғмай кетди қўлқопчаларга

Хонимларнинг нозик қўллари.

Бир тантана содир бўлажак,

Бир тараддуд кезиб юрибди.

Мийиғида кулимсираган

Қуёш буни сезиб юрибди.

Бек АЛИ

​​СЕН ҒАМГА ЁР ЭДИНГ, МЕН САРХУШ ЭДИМ...

​​Сен ғамга ёр эдинг, мен сархуш эдим,

Шаҳар кўчасига оқшом қуюлган,

Порлай бошлаганди юлдузлар энди,

Дарахт новдасига баҳор қўл урган,

Ер юзига гўё Худо бир чимдим

Бола жавҳаридан руҳни юқтирган.

– Ким эди? – ўтиниб сўрардим сендан.

– Шундай кунда сенинг руҳинг чўктирган?..

Сен талқон ютгандинг, мен сархуш эдим,

Рангбаранг ёнарди кўча чироғи.

Соат ўн иккига бонг уриб, энди

Совий бошлаганди пойтахт тупроғи.

– Юр! – дедим. – Кетайлик! Юр! – дедим тағин,

Адо қилмасидан юрагингни ғам.

Кўрдингку, меҳрга келибди қирғин,

Кўрдингку, ер юзи тўла муттаҳам!

Бу ерлардан буткул кетайлик, жоним,

Ҳаёт бўлса керак ахир ойда ҳам.

Бу чексизлик ахир Унинг айвони,

Осмон булут билан топмаган барҳам.

Сен мазлума эдинг, мен сархуш эдим,

Кўнгилни қитиқлаб ўтарди ҳаво.

Сўзласам жунжикиб кетарди этим,

Жунжикиб чарчадим бу тошлар аро!

Кетайлик, юргил, эй манглайи шўриш,

Яқинроқ борайлик, ҳув юлдузларга.

Ерда бунёд бўлиб, ойда жон бериш

Қисмати битилган балки бизларга!

Сен ғамга ёр эдинг, беғам ёр эдим,

Овулимни ташлаб кетганман беғам.

Асли жавҳаримиз сазойи қилиб

Яратилган бўлса, бизларга не ғам!

Масиҳуллоҳ

ҚАҚНУСЛАР САЙРАСА...

Қақнуслар сайраса,

томоғи қонар.

Олам ҳам юз бурар,

гуллар ҳам тонар.

Нега биз учрашсак

яноғинг ёнар?

Эй, менинг ҳабибим,

эй, менинг жоним.

Эй, менинг кўзимга

сиғмаган томчи,

Дунё ҳотам экан,

кўнглим тиламчи.

Мен дедим, кулгингдан

кулади башар,

Кулгингни подшоҳлар

қулдан талашар.

Менингчи, кўксимда

изтироб яшар,

Эй, менинг рафиқим,

эй, менинг жоним.

Борми, айт, қаршингда

мен каби ғариб,

Кўз остинг машриқ-у,

Кўз устинг мағриб.

Изладим, топмадим

дардимга гиё(ҳ),

Сеҳриё дегайман

яна Сеҳриё!..

Сен Ҳорут, мен Морут,

боқмайсан қиё,

Эй, менинг насибим,

эй, менинг жоним.

Дунёда жамийки

унсур алдамчи,

Вужудинг мулкимдир,

иффатинг соқчи.