Фото: “Халқ сўзи”

Россия Федерациясининг Астрахан шаҳрида VIII Каспий медиафоруми бўлиб ўтди. Унда Каспийбўйи давлатлари делегациялари қаторида ўзбекистонлик бир гуруҳ журналистлар ҳам иштирок этди.

Медиафорумда минтақа давлатлари ўртасида ҳамжиҳатлик ва ҳамкорликни мустаҳкамлашда оммавий ахборот воситаларининг муҳим ўрнига оид бир неча мавзулар бўйича сўз юритилди.

Шунингдек, медиа таълим ва умуман юқори профессионал журналист кадрлар тайёрлаш борасидаги муаммолар, тажриба, таклифлар бўйича турли мамлакатлар вакилларининг фикрлари тингланди. Журналистларни қайта тайёрлаш маркази директори Гулнора Бобожонованинг юртимизда бу борада амалга оширилган ва журналистика олий таълимини янада ривожлантириш бўйича бажарилаётган кенг кўламли ишлар ҳақида фикр юритди.

Шунингдек, кейинги йилларда медиа кадрлар тайёрлашга ихтисослашган махсус Ўзбекистон журналистика ва оммавий коммуникациялар университети ташкил этилгани, бир неча марказий ва маҳаллий олий ўқув юртларида журналистика факультетлари очилгани ҳақидаги маълумотлар иштирокчилар эътиборини тортди. Шу билан бирга мамлакатимиздаги журналистларни қайта тайёрлаш бўйича амалга оширилаётган ишлар ҳам кўпчиликда қизиқиш уйғотди.

Аҳмадали Шерназаров, “Халқ сўзи”.