«E-auksion» платформасида Тошкентдаги «Аския» бозорининг мулкий мажмуаси сотувга қўйилган ва биргина таклифнинг ўзида сотув якунланган.

Аукцион атиги 15 дақиқа давом этган ва биргина таклиф киритилгандан сўнг якунланган. Уни «Sheng-Ke International» компанияси амалга ошириб, бошланғич нархдан 5% юқори бўлган 225,59 млрд сўмлик таклифни берган.

Корхоналар ва ташкилотларнинг ягона давлат реестри маълумотларига кўра, ушбу номдаги фирма шу йилнинг май ойида ташкил этилган ва ихтисослаштирилган қурилиш ишлари билан шуғулланади. Устав капитали 68 млрд сўм бўлган компаниянинг ягона таъсисчиси Қозоғистондан бўлган худди шу номдаги МЧЖ, раҳбари эса Чен Майсюан ҳисобланади.

Яккасарой тумани ҳокимлиги 16 ноябрь куни бозорни реконструкция қилиш лойиҳасини тақдим этди. Маъмурият раҳбари Нилуфар Аллабергенова лойиҳада иштирок этишга қизиққан бир нечта салоҳиятли инвесторлар билан музокаралар ўтказилганини маълум қилди.

Янги савдо мажмуаси 3 минг квадрат метрдан иборат экобозор, музлаткичли омборхона, шунингдек, эскалаторлар, пандуслар, Wи-Фи нуқталари, велосипед йўлаклари ва кўнгилочар объектларни ўз ичига олиши кутилмоқда. Бундан ташқари, яқин атрофда 4 юлдузли меҳмонхона қуриш режалаштирилган.

Шундан сўнг бозорнинг мулкий мажмуаси кимошди савдосига қўйилди. Харидордан бозорни реконструкция қилиш ва унинг ҳудудида замонавий савдо-маиший мажмуани яратиш талаб этилади.