Шу кунларда Андижон вилоятининг барча ҳудудларида аҳолига сифатли хизмат кўрсатишни таъминлаш бўйича амалий чора-тадбирлар кўрилмоқда. Инфратузилмани такомиллаштириш, замонавий лойиҳаларни ҳаётга татбиқ этиш орқали фуқаролар турмуш даражасини янада оширишга алоҳида эътибор қаратилмоқда.

Асака туманида оқова сув тармоғини янгилаш ишлари олиб бориляпти. Лойиҳа доирасида истеъмолчиларнинг кундалик эҳтиёжини қондириш, санитария ҳолатини яхшилаш ҳамда экологияга бўлган муносабатни шакллантириш кўзда тутилган.

— Асака туманидаги оқова сув тармоғи 1975 йилда қурилган бўлиб, бугунги кунда яроқсиз ҳолатга келиб қолган, — дейди “Андижон сув таъминоти” АЖ оқова сув тозалаш иншооти механик-технологи Султонбой Ибрагимов. — Шу боис 2 минг 200 метр узунликда янги қувур тортиш ишларига киришилди. Бунинг учун Самарқанд вилоятида фаолият юритаётган “Соҳиб қурилиш дизайн” МЧЖ томонидан тўртта техника воситаси ва 15 нафар тажрибали ишчи жалб этилган.

Лойиҳа фойдаланишга топширилгандан сўнг 170 дан зиёд корхона ва ташкилот ҳамда 40 минг нафар аҳолига хизмат кўрсатиш сифати янада яхшиланади.

Саминжон ҲУСАНОВ

«Халқ сўзи».