Кеча, 26 сентябрь куни Англиянинг қатор ишончли нашрларида «Арсенал» клуби Ҳуго Экитикенинг хизматларига қизиқиш билдираётгани ҳақида ёзилди. Бу эса ўз навбатида қатор саволларни келтириб чиқармоқда.

«Арсенал» клуби ҳужумчини кучайтиришга ҳаракат қилаётгани тушунарли. Аммо, нега айнан улар 2 ой олдин янги жамоасига ўтган ва айни пайтда ёмон ўйнамаётган футболчининг трансфер қила олишга ишонаётганликлари ғалати ҳолат.

Хўш, «Арсенал» нимага ишонмоқда. Бу бўйича чуқурроқ фикр юритиб кўрамиз.

2025 йилнинг 23 июл куни «Ливерпуль» клуби Ҳуго Экитикенинг трансферини эълон қилди. Ушбу трансфердан «Айнтрахт» клуби 95 миллион евро ишлаб олди.

Экитике жамоага келганча Дарвин Нуньес жамоани тарк этди. Шундан сўнг, Ҳуго жамоанинг асосий марказий ҳужумчиси бўлиши маълум бўлиб қолди.

Аммо орадан 40 кун ўтиб, «Ливерпуль» клуби «Ньюкасл»дан Александр Исакни сотиб олди. Албатта ушбу трансфер амалга ошганидан сўнг, Экитике жамоадаги захира ҳужумчига айланиб қолди.

Пайтида Ҳуго ушбу трансфердан норози эмаслигини ва Исакнинг жамоага келиши фақатгина унинг фойдасига ишлашини айтган. Аммо орадан кўп ўтмай аслида Экитике ушбу трансфердан хафа бўлгани маълум бўлмоқда.

Унинг устига Англия Лига кубогида бўлиб ўтган ҳолатдан сўнг, вазият янада чигаллашган. Ушбу ҳолатда футболчилардан тортиб, жамоа бош мураббийи Арне Слотгача Экитикени ёнини олиш ўрнига, уни танқид қилишди. Айниқса, жамоа бош мураббийи матбуот анжуманида «Бу аҳмоқлик. У УЕФА чемпионлар лигасида ёки АПЛ марказий ўйинида ҳал қилувчи голни урганида тушунган бўлардим. Лекин у Лига кубоги гол киритиб, ҳаддидан ошди» — деб таъкидлаган нидерландиялик мутахассис.

Ушбу ҳолат эса футболчининг ҳавасини синдиргани аниқ. Катта эҳтимол «Арсенал» жамоаси айнан шу вазиятдан унумли фойдаланиб қолмоқчи.

Футбол таҳлилчилари Экитикенинг трансфери тушунарсиз тарзда амалга ошгани борасида кўп гапирдилар. Исак сотиб олинар экан, 100 миллионга яқин нархга Экитикени сотиб олишни нима кераги бор эди деган савол кўп бор муҳокама қилинди.

«Ливерпуль» ҳам аслида Исакнинг трансфери олдинроқ амалга ошганида Экитикени сотиб олишдан воз кечиши мумкин эди. Лекин Александрнинг трансфери чўзилгани боис, «мерсисайдликлар» Ҳугони сотиб олишга мажбур бўлишди.

Аммо энди вазият ўзгарди. Таркибидаги ҳолат беқарорлашмаслиги учун балки, «Ливерпуль» раҳбарияти ҳам Экитикени сотиб юборишга қарши бўлмас. Балки, йўқ. Нима бўлишини вақт кўрсатади. Аммо, бир нарса маълумки, энди ушбу мавзу ҳақида гап борса жиддий қабул қилиши керак.