АҚШ депортация қилаётган яна 10 нафар Ўзбекистон фуқароси шу ҳафта давомида Нью-Йорк – Тошкент йўналиши бўйича ватанга қайтарилади. Бу ҳақида Ўзбекистон ТИВ матбуот котиби Аҳрор Бурхонов маълум қилди.

Таъкидланишича, Қўшма Штатлар ушбу фуқароларни Коста-Рикага жўнатишни режалаштирган. Кейинчалик Ўзбекистон ҳамда АҚШ ўртасидаги музокаралар натижасида фуқароларни Ўзбекистонга қайтариш бўйича келишувга эришилган.

Аввалроқ, Ўзбекистон республикаси ўз фуқароларини АҚШдан хавфсиз депортация қилиш масалалари бўйича Қўшма Штатлар ва Лотин Америкаси расмийлари билан мунтазам алоқада бўлиб тургани хабар қилинган эди.

«Бизнинг келишувларимизга асосан, Америка томони депортация қилинадиган фуқароларимизнинг ҳар бир ҳолати ҳақида тезкорлик билан хабардор қилади. Ўрнатилган амалиётга кўра, фуқароларимиз ватанга Нью Йорк–Тошкент йўналиши орқали етиб келишади», — деган Ташқи ишлар вазирилиги вакили.

Эслатиб ўтамиз, 25 февраль куни АҚШ Коста-Рикага депортация қилмоқчи бўлган етти нафар Ўзбекистон фуқароси ватанга қайтарилган эди.

Вашингтон ва Коста-Рика ўртасидаги битимга асосан давлатга АҚШдан депортация қилинган 200 нафаргача бўлган шахслар вақтинча жойлаштирилиши керак эди. Бунда мигрантларга бир ой давомида мамлакатда қолиш ҳуқуқи берилади. Шу муддат ичида уларни ихтиёрий равишда ватанига қайтарилиши масаласи ҳал қилинади. Қайтишни рад этганлар устидан эса индивидуал қарор чиқарилади.

Таъкидлаш жоиз, Доналд Трамп ўзининг қасамёд нутқида ҳам жанубий чегаралардан кириб келаётган хорижликлар оқимини тўхтатиш ва миллионлаб чет элликларни келган жойига қайтариш жараёнини бошлаши ҳақида айтганди.