АҚШ президенти Дональд Трамп маъмурияти чоршанба куни Россиянинг икки йирик нефть компанияси — “Роснефт” ва “Лукойл” ҳамда уларнинг ўнлаб шўба корхоналарига қарши янги санкциялар эълон қилди. Бу қарор Вашингтон Москвани Украинадаги урушни зудлик билан тўхтатишга чақирган бир пайтда қабул қилинди.

Президент Трамп бир неча ҳафтадан бери Россияга нисбатан жазо чораларини кўриш ҳақида гапириб келаётган эди. Унинг сўзларига кўра, санкцияларни жорий этиш учун “энди вақт етиб келган”. Шундай бўлса-да, Трамп чекловлар узоқ давом этмаслигига ва уруш яқин орада тугашига умид билдирди.

АҚШ молия вазири Скотт Бессент ҳам ўз баёнотида қотиллик ва ўт очишни дарҳол тўхтатиш вақти келганини таъкидлади.

«Президент Путин бу бемаъни урушни тугатишдан бош тортгани учун вазирлик Кремлнинг уруш машинасини молиялаштирувчи Россиянинг икки йирик нефть компаниясига санкция жорий этмоқда», — деди Бессент.

Унинг сўзларига кўра, АҚШ иттифоқчилари ҳам ушбу чеклов чораларига қўшилиши ва уларни амалга оширишда ҳамкорлик қилиши лозим.

Бирлашган Қироллик ўтган ҳафтадаёқ “Роснефт” ва “Лукойл”ни нишонга олган эди. Европа Иттифоқи эса пайшанба куни Россиядан суюлтирилган газ импортини тақиқлашни ўз ичига олган навбатдаги санкциялар пакетини расман қабул қилди.

Украинанинг АҚШдаги элчиси Олга Стефанишина янги қарорни олқишлаб, “бу санкциялар Украина позициясига тўлиқ мос келади”, дея таъкидлади.

Таҳлилчилар фикрича, санкцияларнинг таъсири улар қандай амалга оширилишига боғлиқ бўлади. Агар Вашингтон иккинчи даражали санкцияларни ҳам жорий этса, бу Россия билан ишлаётган учинчи мамлакат банклари, нефтни қайта ишлаш заводлари ва савдо компанияларига жиддий босим бўлади.

Ҳозирча “Роснефт” ва “Лукойл”га қарши асосий чекловлар кучга кирди, аммо иккинчи даражали санкциялар ҳақидаги эҳтимол ҳамон очиқ қолмоқда.

«Президент Путин биз кутгандек очиқ музокара қилиш учун келмади. Аляскадаги учрашувда иш юришмади, ва Трамп ҳеч нарса ўзгармаётганини англаб, жиддий чора кўриш вақти келганини тушунди», — деди молия вазири Бессент “Fox Business” нашрига.