Иллюстратив фото

АҚШ молия вазири Скотт Бессент шу ҳафта Украина билан минерал ресурслар бўйича битим имзоланиши мумкинлигини айтди.

Унинг таъкидлашича, томонлар келишувларга “жуда яқин” ва ҳужжат яқин келажакда имзоланиши мумкин. Вазир, шунингдек, ўтган ҳафта охирида Киев вакиллари билан бўлиб ўтган учрашувда келишув бўйича янги таклифлар илгари сурилгани ва музокаралар ҳали ҳам давом этаётганини айтди.

Шу йилнинг 11-12 апрель кунлари Украина ва АҚШ ўртасида Украина ресурсларига оид келишув бўйича маслаҳатлашувлар бўлиб ўтди. “Reuters” хабарига кўра, АҚШ маъмурияти келишув лойиҳасига “Газпром” қувурининг Украина қисми устидан назоратни Европага топшириш талабини киритганлиги сабабли учрашувдаги муҳит “ўта кескин” бўлган.

Шу йилнинг 9 апрель куни Украина Олий Радаси депутати Богдан Кицак Украина АҚШ томонидан таклиф қилинган минерал ресурслар бўйича янги шартнома лойиҳасини имзолашга рози эмаслигини маълум қилди. Унинг айтишича, Киев Қўшма Штатлар томонидан қўйилган шартларни қабул қила олмайди, чунки бу амалда мамлакатнинг иқтисодий ва давлат суверенитетини йўқотишини англатади.