Illyustrativ foto

AQSH moliya vaziri Skott Bessent shu hafta Ukraina bilan mineral resurslar boʻyicha bitim imzolanishi mumkinligini aytdi.

Uning taʼkidlashicha, tomonlar kelishuvlarga “juda yaqin” va hujjat yaqin kelajakda imzolanishi mumkin. Vazir, shuningdek, oʻtgan hafta oxirida Kiyev vakillari bilan boʻlib oʻtgan uchrashuvda kelishuv boʻyicha yangi takliflar ilgari surilgani va muzokaralar hali ham davom etayotganini aytdi.

Shu yilning 11-12-aprel kunlari Ukraina va AQSH oʻrtasida Ukraina resurslariga oid kelishuv boʻyicha maslahatlashuvlar boʻlib oʻtdi. “Reuters” xabariga koʻra, AQSH maʼmuriyati kelishuv loyihasiga “Gazprom” quvurining Ukraina qismi ustidan nazoratni Yevropaga topshirish talabini kiritganligi sababli uchrashuvdagi muhit “oʻta keskin” boʻlgan.

Shu yilning 9-aprel kuni Ukraina Oliy Radasi deputati Bogdan Kitsak Ukraina AQSH tomonidan taklif qilingan mineral resurslar boʻyicha yangi shartnoma loyihasini imzolashga rozi emasligini maʼlum qildi. Uning aytishicha, Kiyev Qoʻshma Shtatlar tomonidan qoʻyilgan shartlarni qabul qila olmaydi, chunki bu amalda mamlakatning iqtisodiy va davlat suverenitetini yoʻqotishini anglatadi.