Фото: “Annahar”

Америка Қўшма Штатлари Туркия ҳукумати билан яқин ҳамкорликда «Ироқ ва Шом исломий давлати» (ИШИД) экстремистик гуруҳига алоқадор уч нафар ўзбекистонликка нисбатан санкциялар жорий қилди. Бу ҳақда АҚШ Давлат департаменти хабар берди.

Қайд этилишича, Қўшма Штатлар ИШИД билан алоқадор бўлган тўрт кишига, жумладан, гуруҳга алоқадор одам контрабандаси тармоғи аъзоларини «қора рўйхат»га киритган.

Санкция рўйхатида қуйидаги шахслар бор:

• Муҳаммадюсуф Алишер ўғли Мирзоев (2023 йил ўрталарида ИШИДга алоқадор «ҳарбий» ўқув лагерини ташкил этишда иштирок этган);
• Муҳаммад Иброҳимжон Ниёзов (у Ўзбекистон фуқароси бўлиб, ИШИДга алоқадор контрабанда тармоғи тарафдоридир. Ниёзов Туркиядаги ИШИД аъзоларига административ ва логистика ёрдам кўрсатган);
• Олимхон Маҳмуджон ўғли Исмоилов (ИШИДга алоқадор контрабанда тармоғининг аъзоси).

Адам Хамирзаев исмли шахс эса янгиланган рўйхатда тўртинчи ўринни эгаллаган. АҚШ Молия вазирлигининг хабар беришича, 1985 йилда туғилган бу шахс Россияда туғилган ва «Андрей Гузун», «Адам Олиферчик» ёки «Адам Абу Даррар Ал-Шишани» исмлари билан ҳам танилган.

Қўшимча қилинишича, Хамирзаев ИШИДнинг Грузиядаги амири бўлиб чиқди, у ИШИД контрабанда тармоғига унинг фаолияти бўйича кўрсатмалар берган. У рўйхатга гуруҳ таркибидаги етакчи сифатида қўшилган, бу ҳам унинг мулки ва активларининг блокланиши ва музлатилишига олиб келади.

Юқоридаги шахсларнинг Қўшма Штатлардаги мулки ёки америкаликлар назоратидаги мол-мулклари блокланади. АҚШ резидентларига одатда санкцияланган шахслар билан бизнес қилиш тақиқланади. Ушбу шахслар билан муайян операцияларни амалга оширадиган ҳар қандай АҚШ ёки чет эллик шахслар санкциялар хавфи остида бўлиши мумкин.