Видеодан кадр

Ижтимоий тармоқларда «Жанубий Фарғона» канали ёрилиши оқибатида экин майдонлари ва кўчаларни сув босгани айтилган видеолар тарқалди. Андижон вилояти Фавқулодда вазиятлар бошқармаси ҳодиса юзасидан маълумот берди.

Билдирилишича, бугун, 8 май куни вилоятнинг Булоқбоши тумани Сарвонтепа МФЙ ҳудудидан оқиб ўтувчи Жанубий Фарғона канали қирғоқларининг бирига шикаст етиши оқибатида маълум миқдорда сув сизиб чиққан.

«Ушбу маълумот олиниши билан вилоят Норин–Қорадарё ирригация тизимлари бошқармаси томонидан сув буткул тўхтатилган», дейилади бошқарма хабарида.

Қўшимча қилинишича, ҳозирда Андижон вилояти ФВБ раҳбарияти ва керакли бўлган барча куч ва воситалар содир бўлган ҳодисани бартараф этиш учун жалб этилган ва вазият тўлиқ назоратга олинган.

«Ҳолат юзасидан қўшимча маълумот тақдим этилади», деб ёзади ФВБ ахборот хизмати.

Гидрометеорология хизмати агентлигининг хабар беришича, талофатлар ўрганилганда, жами 560 та хонадонни сув босгани аниқланган.

Шунингдек, агентлик дамба ўпирилиши билан боғлиқ техноген ҳодисанинг келиб чиқиш сабаблари сифатида ушбу каналда қўшимча ГЭС қуриш мақсадида ортиқча сув ташланганини келтирган.