Сенатнинг ўнинчи ялпи мажлисида маъқулланган қонунлар ва муҳокама қилинган масалалар мазмун-моҳиятини кенг жамоатчиликка етказиш мақсадида сенаторлар ҳудудларда учрашувлар ўтказмоқда.

Шу мақсадда Сенатнинг Мудофаа ва хавфсизлик масалалари қўмитаси раиси Қутбиддин Бурхонов хизмат сафари билан Андижон вилоятида бўлиб, халқ депутатлари вилояти Кенгашида тегишли тадбир ташкил этилди.

Унда вилоят, туман ва шаҳар Кенгашлари депутатлари, котибият мудирлари, вилоят прокуратураси, адлия, мактабгача ва мактаб таълими бошқармалари масъул ходимлари иштирок этди.

Тадбирда Сенатнинг ўнинчи ялпи мажлисида кўриб чиқилган муҳим қонунлар, хусусан «Ўзбекистон Республикасининг айрим қонун ҳужжатларига транспорт хизмати кўрсатишни ташкил этиш тизимини такомиллаштиришга қаратилган ўзгартириш ва қўшимчалар киритиш тўғрисида»ги ҳамда «Кредиторларнинг гаров билан таъминланган талабларини қаноатлантириш тизими такомиллаштирилиши муносабати билан Ўзбекистон Республикасининг айрим қонун ҳужжатларига қўшимчалар киритиш тўғрисида»ги қонунлар ва бошқа масалалар мазмун-моҳияти ҳақида фикр юритилди.