Фото: Иллюстратив фото

Андижон вилоятининг Марҳамат туманидаги 42-умумтаълим мактабида ўқитувчилар ҳашар ишларига мажбурий жалб қилинган. Ҳолат юзасидан мактаб директори лавозимидан озод этилди ва жаримага тортилди.

Жорий йил 2 август куни ижтимоий тармоқларда «Марҳамат туманидаги 42-умумтаълим мактабида ҳашарми?» сарлавҳаси остида педагогларнинг қурилиш-таъмирлаш ишларида иштирок этаётганини акс эттирувчи видеолар тарқалди.

Мазкур ҳолат бўйича ўтказилган хизмат текшируви натижаларига кўра, Андижон вилояти Марҳамат тумани Янги ҳаёт маҳалласида жойлашган 42-мактабда бир гуруҳ ўқитувчилар таъмирлаш ишларига жалб қилинган бўлиб, бу ҳолат 2025 йил 2 август куни содир бўлган.

Мактаб жамоаси билан ўтказилган суҳбатда, педагоглар ушбу ишларни «ихтиёрий» равишда бажарганликларини билдирган. Бироқ, устозларни лавозим мажбуриятидан ташқари ишга жалб этиш ҳолати назоратга олинмагани сабабли, мактаб директори З. М. лавозимидан озод этилди.

4 август куни Камбағалликни қисқартириш ва бандлик вазирлиги ҳузуридаги Давлат меҳнат инспекцияси томонидан ўтказилган ўрганиш натижасида ўқитувчиларнинг мажбурий меҳнатга жалб қилингани тасдиқланди.

Натижада, мактаб раҳбари З. М. нисбатан Маъмурий жавобгарлик тўғрисидаги кодекснинг 51-моддаси 2-қисми асосида БҲМнинг 100 баравари миқдорида жарима қўлланилди.