CNBC News хабарига кўра, Тесла бош директори Илон Маск компанияни тарк этиши мумкин — агар унга 1 триллион долларлик компенсация пакети тўланмаса.

Хабарда айтилишича, Тесла кузатув кенгаши раиси Робин Денҳолм акциядорларга юборган мактубида огоҳлантирган:

«Агар Маскка тўлов тасдиқланмаса, у компанияни тарк этиши мумкин. Илонсиз Тесла ўз қийматининг катта қисмини йўқотади, чунки бизни энди келажакдаги инновацион компания сифатида эмас, оддий автомобиль ишлаб чиқарувчи сифатида кўришади».

Денҳолмнинг сўзларига кўра, Маск компаниянинг келажагини белгиловчи асосий шахс бўлиб, Тесла энди «фақат навбатдаги автомобиль ишлаб чиқарувчи» эмас — балки тўлиқ автопилот тизими ва «Optimus» роботлари йўналишида фаол ривожланмоқда.

У, шунингдек, бу масала «пул ёки мукофот миқдорига қараганда кўпроқ — таъсир ва назорат ҳақида» эканини таъкидлади. Маск, хусусан, сунъий интеллект устидан хавфсиз назоратни сақлаш учун етарли даражадаги таъсир кучига эга бўлишни истаётганини билдирган — у илгари «Optimus роботлар армияси» устидан назорат йўқолишидан хавотир билдирган эди.

Эслатиб ўтамиз, сентябрь ойида Тесла Илон Маск учун янги компенсацион тўлов режасини таклиф қилган эди. Режага кўра, у 10 йил ичида 1 триллион долларгача мукофот олиши мумкин бўлади. Шартларга мувофиқ, компаниянинг бозор қиймати ўсиши талаб этилади. Шартлар бажарилса, Маск Тесла акцияларининг 25 фоизига эгалик қилади.

Бироқ бу таклиф кучли қаршиликка дуч келди. Institutional Shareholder Services (ISS) консалтинг фирмаси бу «астрономик миқдор»ни танқид қилиб, акциядорларга қарши овоз беришни тавсия этди.

Бундан ташқари, касаба уюшмалари ва корпоратив кузатувчилар гуруҳи ҳам Маскнинг сиёсий фаолияти бренд имижига зарар етказаётганини айтиб, пакетга қарши кампания бошлади.