Фото: Кинематография агентлиги

Бугун, Ўзбекистонда хизмат кўрсатган санъат арбоби, “Кинематография фидокори” кўкрак нишони соҳибаси, биринчи аёл кинорежиссёри, сценарист ва мультипликатор Қамара Камолова таваллуд топган кун.

Ижодкорни табриклаш мақсадида Кинематография агентлигида тадбир уюштирилди. Тадбирда Агентлик ва тизим ташкилотлари, Киноарбоблар уюшмаси раҳбар-ходимлари, режиссёрнинг дўстлари ва шогирдлари иштирок этишди. Йиғилганлар Қамара Камолованинг ижоди ҳақида гапириб, ушбу фильмлар келажак авлод учун тарбиявий аҳамиятга эга эканлиги хусусида алоҳида тўхталишди.

Агентлик директори Фирдавс Абдухолиқов режиссёрни табриклаб, муҳим ташаббусни илгари сурди: “Биз таниқли режиссёримиз Қамара Шодмоновнанинг фильмларини ёшларга кўпроқ кўрсатишимиз ва тарғиб қилишимиз керак. Ёшларимиз устоз ижодкордан фильмни суратга олишда энг кичик деталларга ҳам эътибор бериш кераклигини ўрганишлари зарур. Мен Қамара опа томонидан, 1975 йилда суратга олинган “Аччиқ данак” бадиий фильмини ёш киночиларимиз янгича талқинда суратга олишлари учун шароит яратишимиз керак, деп ҳисоблайман. Бунинг учун ёш киноижодкорлар орасида танлов эълон қилиб, уларга грант бериш таклифини илгари сурмоқчиман. Ёш режиссёрларимиз танловда қатнашиб, шу фильмнинг янгича талқинини суратга олишса ва Қамара опа фильмнинг бадиий раҳбари сифатида улар билан бирга ишласалар, мақсадга муофиқ бўлар эди. Натижада, биз янги бир фильмга, ёшлар эса катта тажрибага эга бўлган бўлар эди. 2025 йил “Аччиқ данак” кинокартинасининг 50 йиллигини нишонлаймиз, янги талқиндаги фильмни эса премъера қилишимиз мумкин бўлади”.

Ушбу таклифни барча киноижодкорлар қўллаб қувватлаб, “Устоз-шогирд ананаси” ёшларга фақат катта тажриба — мактаб бўлиб хизмат қилишини таъкидлашди. Камара Камолова ҳам ёшларга жон-дили билан кино сирларини ўргатишини, фильмини ремейк усулида суратга олинишидан хурсандчилигини билдириб шундай деди: “Менинг шиорим — “Яхшилик, гўзаллик, муҳаббат”. Сизларга ҳам шуни тилайман!”.