АҚШ президенти Дональд Трамп Эрон билан савдо қилаётган давлатлардан АҚШга киритиладиган товарларга қўшимча бож тўловларини жорий этиш имконини берувчи фармонни имзолади. Мазкур ҳужжат Оқ уй расмий сайтида эълон қилинди.

Фармонга мувофиқ, Вашингтонга қўшимча адвалор бож тўловларини жорий этиш имконини берувчи тизим тасдиқланди. Ушбу тўловлар Эрондан тўғридан-тўғри ёки билвосита товар ёки хизматларни сотиб оладиган, импорт қиладиган ёки бошқа йўллар билан қабул қиладиган исталган давлатда ишлаб чиқарилган маҳсулотларнинг АҚШга импорт қилинишига нисбатан қўлланилиши мумкин.

Шу билан бирга, фармонда қайд этилишича, агар «вазият ўзгарса», жумладан Эрон миллий фавқулодда ҳолатни бартараф этиш йўлида «сезиларли қадамлар» ташласа, АҚШ президенти ушбу қарорни қайта кўриб чиқиши мумкин.

Ҳужжатда таъкидланишича, президент Эронни ядровий салоҳиятга эришишга интилиш, терроризмни қўллаб-қувватлаш, баллистик ракеталар ишлаб чиқиш ҳамда минтақада беқарорликни кучайтириш учун жавобгар деб ҳисоблайди. Бу ҳаракатлар АҚШ хавфсизлигига, унинг иттифоқчилари ва миллий манфаатларига таҳдид солиши қайд этилган.