Абат Файзуллаев Ўзбекистоннинг Мальтадаги биринчи элчиси сифатида мамлакат президенти Мириам Спитери Дебонога ишонч ёрлиқларини топширди. Бу ҳақда «Дунё» ахборот агентлиги хабар берди.

Қайд этилишича, тантанали тадбирдан сўнг бўлиб ўтган қисқача мулоқотда Мальта етакчиси Ўзбекистон Президенти томонидан олиб борилаётган очиқ ва прагматик ташқи сиёсат натижасида икки томонлама муносабатлар фаоллашганини таъкидлаган.

«Мамлакатларимиз географик жиҳатдан бир-биридан олисда жойлашган бўлсада, ўзаро манфаатли ва кўп қиррали ҳамкорлик икки томонлама муносабатларни ривожлантиришга хизмат қилаётгани қайд этилди. Учрашувда халқаро ташкилотлар, шу жумладан БМТ ва ЕХҲТ доирасидаги ўзаро ташаббусларни қўллаб-қувватлашга алоҳида урғу қаратилди», дейилади хабарда.

Эслатиб ўтамиз, Абат Файзуллаев 2023 йил ноябрь ойидан буён Ўзбекистоннинг Италиядаги элчиси ва Римдаги халқаро ташкилотлар (ФАО, ҚХРХЖ, БООД) ҳузуридаги доимий вакили ҳамда 2024 йил декабрь ойидан бошлаб Ўзбекистоннинг Кипрдаги элчиси сифатида фаолият юритиб келмоқда.

Абат Файзуллаев 2020-2023 йилларда Ўзбекистоннинг Австриядаги ва ўриндошлик асосида Венгриядаги элчиси сифатида ишлаган. У бир вақтнинг ўзида Ўзбекистоннинг Европада хавфсизлик ва ҳамкорлик ташкилоти ҳамда Венадаги бошқа халқаро ташкилотлар ҳузуридаги доимий вакили лавозимида фаолият олиб борган.