Фото: Иллюстратив фото

5 август куни содир бўлган кучли қуёш чақнаши оқибатида ажралган плазма массаси Ерга етиб келиш арафасида. Ушбу жараён 8 август, жума куни соат 09:00 (Тошкент вақти) атрофида содир бўлиши кутилмоқда, деб хабар бермоқда ТАСС.

Мутахассислар маълум қилишича, қуёш чақнаши M4.4 даражасида бўлиб, у натижасида шаклланган юқори тезликдаги плазма ядроси Ернинг магнит майдонига кучли зарба беради. Бу эса аввал тахмин қилинганидан анча кучли геомагнит таъсирларга олиб келиши мумкин.

— Моделлар шуни кўрсатмоқдаки, юқори тезликдаги плазма Ер атмосферасига урилганда магнит майдонидаги ўзгаришлар сезиларли бўлади. Бу 13 июндан бери кузатилган энг юқори даражадаги ўзгариш бўлади, — дейилади хабарда.

Магнит бўрони бошланиши 8 август куни эрталаб эмас, балки тунги пайт — 7 августдан 8 августга ўтар кечасиёқ бошланиши мумкин. Бу вақтда геомагнит индекс (Kp индекси) 6 даражагача ошиб кетиши кутилмоқда.

Эслатма: Бундай геомагнит фаолликлар айрим инсонларда бош оғриғи, уйқусизлик, асабийлик ва чарчоқни кучайтириши мумкин. Шу сабабли, айниқса, юрак-қон томир касалликлари билан оғриган фуқароларга эътиборли бўлиш тавсия этилади.