Рақобат қўмитасига хонадон харид қилиш бўйича ўз вақтида тўловларни амалга оширган фуқароларга айрим қурувчи ташкилотлар томонидан белгиланган муддатларда хонадонлар топширилмагани юзасидан мурожаатлар келиб тушган.

Маълумки, Ўзбекистон Республикасининг «Истеъмолчиларнинг ҳуқуқларини ҳимоя қилиш тўғрисида»ги Қонуни 19-моддасига мувофиқ, ижрочи томонидан шартномада ёки белгиланган қоидаларда кўрсатилган муддат, ҳажм ва сифат талабларига қатъий риоя этилган ҳолда ишларни бажариши ёки хизматларни кўрсатиши шарт.

Шу муносабат билан, Ҳудудий бошқарма томонидан истеъмолчилар манфаатларини ҳимоя қилиш мақсадида қурилиш соҳасидаги қонунбузилиш ҳолатлари бўйича суд органларига жами 32 нафар истеъмолчи манфаатида 11 миллиард сўмдан ортиқ маблағни ундириш ҳақида даъво аризалари киритилган.

Олиб борилган ишлар натижасида «GLAMUR GOLD», «TRANSPORT FREE GROUP», «LUCKY TECHNICAL», «BROCCOLI PLUS», «NUR» МЧЖларга нисбатан 16 нафар истеъмолчи фойдасига жами 6,7 миллиард сўм миқдоридаги маблағни қайтариш тўғрисида суд томонидан ҳал қилув қарор қабул қилинган.

«Айни пайтда қолган истеъмолчиларнинг бузилган ҳуқуқларини тиклаш юзасидан суд ишлари белгиланган тартибда давом эттирилмоқда», — дейилади қўмита хабарида.