Ўзбекистон дзюдо терма жамоаси аъзоси Шарофиддин Болтабоев спортчилик фаолиятини якунлаганини маълум қилди. У бу ҳақда «Инстаграм» тармоғидаги саҳифасида ёзиб қолдирган.

«Ҳозирда жуда ҳам оғир кунларни, стрессларни бошимдан ўтказяпман. Сабаби 25 йиллик меҳнатларим ва орзуларимдан воз кечяпман! 4 ёшимда шу спортни бошлаганман. Ҳар бир ишимда фақат шу спорт билан бўлганман. 11 йил узликсиз терма жамоада юртим учун татамига чиқдим. Ҳеч қачон юртимнинг ор номусини сотмадим!», деб ёзган спортчи.

Шунингдек, дзюдочимиз ўзи учун энг оғир қарорни қабул қилаётганини ва юртдошларидан буни тўғри тушунишларини сўраган.

«Олимпиада медалини олиб келаман деб, ҳаракат қилдим. Лекин тақдиримга ёзилмаган экан. Аллоҳ энг яхшисини билгувчи. Соғ-саломат бўлинглар», деб якунлаган Болтабоев.

Шарофиддин Пўлатович Болтабоев 1995 йил 19 ноябрда Қорақалпоғистон Республикаси Амударё туманида туғилган. Юртимиз шарафини Шарофиддин 81 кг гача вазн тоифасида ҳимоя қилиб келган. «Токио-2020» ва «Париж-2024» ёзги олимпиада ўйинлари иштирокчиси, уч карра Осиё чемпионати совриндори ҳисобланади.

«Халқ сўзи» спортчимизга келгуси фаолиятида муваффақият тилайди.

Аввалроқ, Исломжон Баҳромов 25 ёшли шимолий кореялик курашчига жуда тез мағлуб бўлгани ҳақида хабар берилганди.