Фото: Soliq.uz

Жорий йилнинг II чораги давомида солиқ тушумлари 45 триллион сўмдан ортди. Бу ҳақда «Фискал таҳлиллар» портали маълум қилди.

«Республика бўйича 2024 йил II чорагида солиқ органлари томонидан бюджетга 45,5 триллион сўмга яқин тушумлар таъминланди. Бу ўтган йилнинг мос даврига нисбатан 18,4 %га кўп», дейилади хабарда.

Солиқ турлари кесимида тушум (ўтган йилнинг мос даврига нисбатан ўсиш) фойда солиғи 9,5 триллион сўм (10,6%), ҚҚС 9,4 триллион сўм (26,5%), ЖШОДС 9,2 триллион сўм (18,7%), акциз солиғи 4,6 триллион сўм (36,6%), ер қаъридан фойдаланганлик учун солиқ 4,1 триллион сўм (16,2%), ер солиғи 2,2 триллион сўм (32,1%), мол-мулк солиғи 1,8 триллион сўм (45%), АОС 756,1 миллиард сўм (1,7%), сув ресурсларидан фойдаланганлик учун солиқ 186,1 миллиард сўм (0,4%) ташкил этган.

Аввалроқ, берилган огоҳлантиришлар, профилактик суҳбатлар, кўрилган интизомий чоралардан хулоса чиқармасдан хато ва камчиликларга йўл қўйган ҳамда белгиланган самарадорлик кўрсаткичлари паст бўлган Қашқадарё, Андижон, Фарғона вилояти солиқ бошқармалари бошлиқлари ўринбосарлари, Пахтаобод, Избоскан, Шароф Рашидов ва Янги Наманган тумани солиқ инспекцияси бошлиқлари ҳамда 25 нафар масъуллар билан тузилган меҳнат шартномаси бекор қилинганди.

Шунингдек, 150 нафарга яқин ходимга интизомий чоралар белгиланди 15 нафар ходимнинг унвони 1 поғонага пасайтирилди.