Фото: Архив сурат

2022 йилда Ўзбекистонда маданият ва санъат йўналишида бир нечта халқаро ва республика фестиваллари ўтказилди. Хусусан, «Тошкент баҳори», «Лазги», «Бойсун баҳори», «Халқаро зардўзлик ва заргарлик», «Гуллар байрами» ҳамда XV МДҲ илмий ва ижодий зиёлилари форуми халқаро тадбирлари ташкил этилди.

Бундан ташқари, бир қатор танловлар ва лойиҳалар йўлга қўйилди. Жумладан, ўқувчи ва талабалар ўртасида маданият ва санъатга оид 6 та кўрик-танловнинг таълим муассасалари, туман (шаҳар), вилоят ва республика босқичлари юқори савияда ўтказилди.

Маданият марказлари 3 турдаги (рубоб, танбур, доира) 2 450 та мусиқа чолғу асбоби, 9 000 та янги методик қўлланма, 71 та электрон адабиёт шаклидаги методик қўлланма, QR-кодли 1 800 та инновацион жиҳоз билан таъминланди. Ёшларнинг мусиқий саводхонлигини ошириш мақсадида таълим муассасаларида 36 та лекторий концерт дастурлари ўтказилди.

Шунингдек, «Сўғдиёна» халқ чолғулари камер оркестри, Ботир Зокиров номидаги миллий эстрада симфоник оркестри, Давлат академик халқ чолғулари оркестри, «Ўзбекистон», «Навбаҳор» ашула ва рақс ансамбллари иштирокида 32 та концерт-томоша ташкил этилди.