Юртимизда 2022-2023 йил қиш ва баҳор мавсуми учун асосий турдаги қишлоқ хўжалиги маҳсулотлари (картошка, пиёз, сабзи, гуруч) захираси ташкил этилди.

Яъни, картошка 291 минг тонна, пиёз 74,5 минг тонна, сабзи 138,4 минг тонна, гуруч 78,9 минг тонна захираси шакллантирилди. Бориш қийин бўлган тоғли ҳудудлар ва олис чўл зоналарига бугунги кунгача ун 12,4 минг тонна, ўсимлик ёғи 1 622 тонна, шакар 1 828 тонна, гуруч 1 692 тонна, картошка 7,9 минг тонна озиқ-овқат маҳсулотлари етказиб берилган.

Бу ҳақда Олий Мажлис Қонунчилик палатасида бўлиб ўтган навбатдаги “Ҳукумат соати”да Қишлоқ хўжалиги вазири А.Воитов маълум қилган.

Қайд этилганидек, жорий йилда аҳолини асосий турдаги озиқ-овқат маҳсулотлари билан таъминлаш, бозорларда маҳсулотларнинг нарх барқарорлигини сақлаш бўйича тегишли вазирлик ва идоралар билан бирга бир қатор амалий ишлар олиб борилган.

Жумладан, давлатимиз раҳбарининг тегишли Фармони билан аҳолини ижтимоий аҳамиятга эга бирламчи маҳсулотлар билан таъминлаш ҳамда ички бозорда озиқ-овқат маҳсулотлари нархи ошиб кетишининг олдини олиш мақсадида 23 турдаги озиқ-овқат маҳсулотларига (гўшт маҳсулотлари, балиқ, сут маҳсулотлари, тухум, мевалар, цитрус мевалар, ўсимлик ёғи, ун ва бошқа озиқ-овқат маҳсулотлари) 2023 йил 1 январига қадар импорт божхона божининг ноль ставкаси 2023 йилнинг 1 июлига қадар узайтирилди. Натижада асосий озиқ-овқат маҳсулотлари нархлари кескин ошиб кетишининг олди олинди. Хусусан, мол гўшти нархи 4 фоизга, товуқ гўшти 2 фоизга ошган бўлса, қўй гўшти 5 фоизга, кунгабоқар ёғи 9 фоизга тушган.