Президентнинг «Кичик ва ўрта бизнеснинг иқтисодиётдаги ўрнини ошириш чора-тадбирлари тўғрисида»ги фармони қабул қилинди.

Фармон билан 2025 йилда кичик ва ўрта тадбиркорликни ривожлантиришнинг асосий мақсадли кўрсаткичлари этиб шу турдаги бизнеснинг ялпи ички маҳсулотдаги улушини 55, саноатда 34, экспортда 34 фоизга ва аҳоли бандлигини таъминлашда 75 фоизгача етказиш, камида 600 нафар кичик ва ўрта бизнес субъектларининг йириклашишига кўмаклашиш орқали уларни «чемпион» тадбиркорларга айлантириш, 100 нафардан кўп ишчиси бор тадбиркорлик субъектлари сонини 4 мингга етказиш белгиланди.

2025 йил 1 майдан ўзини ўзи банд қилган шахслар ЙТТ ёки юридик шахс сифатида давлат рўйхатидан ўтказилганда, давлат божи ундирилмайди.

Шунингдек, ўз фаолиятини тегишинча ЯТТ, микрофирма ёки кичик корхона тоифасигача йириклаштирган ўзини ўзи банд қилган шахслар ва тадбиркорларга Оилавий тадбиркорликни ривожлантириш дастури доирасида 50 миллион сўмгача, Кичик бизнесни узлуксиз қўллаб-қувватлаш комплекс дастури доирасида — 150 миллион сўмгача гаровсиз кредитлар ажратилади.

Ўз фаолиятини тегишинча ўрта ёки йирик бизнес тоифасигача кўтарган тадбиркорларга 1 йил давомида ҚҚС суммаси ўрнини қоплаш (қайтариш) 7 кун муддатда тезлаштирилган тартибда амалга оширилади.