2025 йил 1 апрелдан Ўзбекистонда электр энергияси ва табиий газ нархлари оширилиши белгиланган. Мазкур ўзгаришлар “Ёқилғи-энергетика соҳасида бозор механизмларини жорий этишнинг қўшимча чора-тадбирлари тўғрисида”ги ҳукумат қарори асосида амалга оширилмоқда. Шу билан бирга, аҳоли ва тадбиркорлар учун қулайлик сифатида олдиндан тўлов қилинган ҳолатда белгиланган муддат мобайнида эски тарифлар сақланиши таъминланади.

Ҳукуматнинг “Электр энергияси ва табиий газдан фойдаланиш қоидаларини тасдиқлаш тўғрисида”ги қарорига асосан, маиший истеъмолчилар газ ва электр энергияси учун олдиндан тўлов қилган тақдирда, улар икки ой давомида эски тарифлар асосида тўлов амалга оширишлари мумкин. Бошқа истеъмолчилар, яъни тадбиркорлик субъектлари эса бир ой давомида қўшимча тўловлардан озод этилади.

Электр энергияси учун янги тарифларга кўра, 1 kW·h учун ойлик истеъмол 200 kW·h’гача бўлган ҳолда нарх 450 сўмдан 600 сўмгача оширилади. Агар бу миқдор ошса, 201–1000 kW·h учун 500 сўм, 1000–5000 kW·h учун 750 сўм, 5000–10 000 kW·h учун 875 сўм, 10 000 kW·h’дан юқори бўлса 1000 сўм қилиб белгиланади. Электр плиталар билан жиҳозланган уйлардаги аҳоли учун тариф 225 сўмдан 300 сўмгача кўтарилади. Бундан ортиқ истеъмол қилганлар учун тарифлар ҳам юқорироқ белгиланади.

Газ нархлари ҳам сезиларли даражада оширилади. Иситиш мавсумида, яъни ноябрдан февралгача, 500 куб метргача бўлган газ истеъмоли учун нарх 650 сўмдан 1000 сўмгача кўтарилади. 500–2500 куб метр учун 1800 сўм, 2500–5000 куб метргача 2100 сўм, 5000–10 000 куб метр учун 2500 сўм, 10 000 куб метрдан юқори истеъмол учун эса 3000 сўм қилиб белгиланади.

Мартдан октябргача бўлган даврда ҳам шунга ўхшаш тарифлар амалда бўлади. 100 куб метргача газ истеъмоли учун нарх 1000 сўм, 101–2500 куб метр учун 1800 сўм, 2500–5000 куб метр учун 2100 сўм, 5000–10 000 куб метр учун 2500 сўм, 10 000 куб метрдан ортиқ истеъмол учун эса 3000 сўм этиб белгиланган. Шунингдек, аҳоли учун суюлтирилган газ нархи 1 кг учун 2000 сўмгача оширилади.

Мазкур тарифлар аҳолининг ва тадбиркорларнинг энергия ресурсларидан самарали ва тежамкор фойдаланишини таъминлаш, шунингдек, энергетика тизимида бозор механизмларини жорий қилишга қаратилган. Тартибда белгиланган муддатларда олдиндан тўлов қилган фуқаролар учун эски тарифлардан фойдаланиш имконияти – жорий ўзгаришларни юмшатувчи муҳим омил сифатида хизмат қилмоқда.