Иллюстратив фото

Украина ва Россия можароси Москва фойдасига ҳал бўлса, Россия президенти Владимир Путин гўёки Украина билан тўхтамайди. Бу фикрларни АҚШ Қуролли кучлари штаб бошлиқлари бирлашган қўмитаси раиси, генерал Дэн Кейн АҚШ Конгрессидаги эшитувда айтиб ўтди, дея хабар бермоқда «The Hill» нашри.

Мақолада қайд этилишича, бундай риторика АҚШ президенти Дональд Трампнинг бу борадаги позициясига «кескин қарама-қаршидир».

Эшитувда сенатор Линдси Грэм Кейнга хорижий можаролар бўйича қатор саволлар бериб, Путин «Украинада тўхтаб қоладими?», деб сўраган. Кейн эса «Мен бундай бўлишига ишонмайман», дея жавоб берган.

Олдинроқ Германия Федерал разведка хизмати раҳбари лавозимини тарк этаётган Бруно Кал «Украина Россиянинг Ғарб йўлидаги бир қадам, холос» деган эди. Унинг фикрича Россия Украинани НАТО мамлакатларига ҳужум қилиш йўлидаги оралиқ босқич сифатида кўрмоқда.

“Биз мутлақо аминмиз ва бизда разведка маълумотларига эга бўлган далилларимиз бор, Украина Россиянинг Ғарб йўлидаги бир қадамдир”, — дейди Кал.

Эслатиб ўтамиз, аввалроқ Украина президенти Владимир Зеленский Россия Қуролли кучларининг зарбалари АҚШ ва бошқа мамлакатларнинг Россияни тинчликка «мажбурлаш» уринишларидан кўра «баландроқ бўлганини» ва шу сабабли Москвага қарши чора кўришга чақирганди. Унинг фикрича, Россияга «тинчлик учун қаттиқ босим ўтказиш керак».

Зеленский Трампга маслаҳат берди
Зеленский «Bild» нашрига берган интервьюсида АҚШ президенти Дональд Трамп Москвани музокаралар столига тортиш учун Россияга қарши санкциялар жорий қилиши кераклигини маслаҳат берди.

«Менимча, тарихан гапирадиган бўлсак, унинг (Трамп) учун бутун дунёда тинчликни тиклашдан муҳимроқ нарса бўлиши мумкин эмас. Трамп санкциялар киритиши керак, шунда Путин дарҳол: «Келинг, урушни тугатиш ҳақида гаплашамиз», десин. Акс ҳолда натижа бўлмайди», — дейди Зеленский.

Унинг сўзларига кўра, Трамп гўёки «Россия томони тўлиқ ҳалол ва очиқ эмаслигини» кўрмоқда.

«Москва «кучдан бошқа нарсани тушунмайди» ва АҚШда бу куч бор» — дея сўзини давом эттирган Украина раҳбари Вашингтон буни тушунишига умид билдириб.

Аввалроқ, «Bloomberg» агентлиги АҚШ Конгресси сенатор Линдси Грэмнинг Россияга қарши янги санкциялар тўғрисидаги қонун лойиҳасини президент Дональд Трампнинг розилигисиз қабул қилишга ҳали тайёр эмаслиги ҳақида хабар берган эди. АҚШ президенти Грэмнинг қонун лойиҳасини ҳали ўқиб чиқмаган.

Можаро ҳақида Трампнинг янги баёноти
Трамп Россия ва Украина ўртасидаги можаро ҳақида янги баёнот бериб, уни «дрон уруши» деб атади

«Россия ва Украина ўртасидаги биз тўхтатмоқчи бўлган даҳшатли урушга назар ташласангиз, бу дрон уруши эканлигини кўрасиз», — дейди у.

Оқ уй раҳбарининг қўшимча қилишича, дронлар ўзини тезкор ва ақлли тизимлар эканлигини исботлаган ва уч йил аввал улар жанг майдонида бунчалик машҳур бўлишини ҳеч ким тасаввур қилмаган эди.

«Дрон бунчалик кучли қурол бўлади, деб ким ўйлабди! Лекин у бошқа кўплаб қурол турларини, ҳаттоки самолётларни ҳам ўрнини босмоқда», — дейди АҚШ президенти.

Ўтган ҳафта Россия президенти Владимир Путин Россиянинг учувчисиз тизимларини маълум сегментларда дунёдаги энг илғори деб атаб, чет элликлар кўпинча улардан нусха кўчиришини айтган эди.