Jahon sogʻliqni saqlash tashkiloti bosh direktori Tedros Gebreyesus Jenevada oʻtkazilgan navbatdagi brifingda COVID-19 va grippga qarshi emlanishni tavsiya qildi.

Qayd etilishicha, soʻnggi oylarda dunyo boʻyicha koronavirus tufayli kasalxonada davolanish va oʻlim koʻrsatkichlari ortib boryapti. Qolaversa, qator mintaqalarda gripp mavsumi boshlanmoqda.

Har ikki kasallikning bir vaqtda kuchayishi sogʻliqni saqlash tizimlari uchun ortiqcha yuklamalarni yuzaga keltirishi mumkin. Shu bois hozirdan zarur profilaktik choralar koʻrish talab etiladi.

Chunki mavsumiy gripp har yili 650 ming nafarga yaqin insonning oʻlimiga sabab boʻlmoqda. Oʻz navbatida, bu virus turli surunkali kasalliklarning rivojlanishi uchun qulay muhit yaratishi bilan xavfli.

Shundan kelib, JSST nafaqat COVID-19, balki grippga qarshi emlanishni ham tavsiya qildi.

“Bunga, birinchi navbatda, xavf guruhiga mansub aholi qatlami — homilador ayollar, 6 oylikdan 5 yoshgacha boʻlgan bolalar, keksa yoshli insonlar (65 yoshdan katta), surunkali kasalliklari bor bemorlar va tibbiyot xodimlari amalga qilishlari maqsadga muvofiq” — deyiladi tashkilot xulosasida.