Foto: Prezident matbuot xizmati

Prezident Shavkat Mirziyoyev ishtirokida oʻtayotgan Xalq deputatlari Jizzax viloyati Kengashining navbatdan tashqari sessiyasida M-39 magistral yoʻlining Jizzax hududidan oʻtgan 98 kilometr qismida yoʻlovchi va haydovchilarning xavfsiz harakatlanishi uchun sharoitlarni yaxshilash topshirildi.

Jizzax shahri markazidagi “Istiqlol” bogʻi, unga tutash Sangzor daryosi boʻyidagi yerlar uzoq yillardan buyon qarovsiz yotgan edi. Yil boshida 24 milliard soʻm ajratilgani natijasida bu yerlarning qiyofasi butunlay oʻzgarib, odamlar hordiq chiqaradigan maskanga aylandi.

Kelasi yil Sangzor daryosini tozalash, suv bilan toʻldirish, piyodalar oʻtish koʻprigi va amfiteatr qurish uchun yana 20 milliard soʻm berilishi belgilandi.

M-39 va A-376 xalqaro yoʻllarning 150 kilometri Jizzaxdan oʻtgani yoʻl boʻyi servisini rivojlantirish uchun katta imkoniyat ekani koʻrsatib oʻtildi. Magistral yoʻl boʻyida alohida yoʻlakdan kiriladigan, Yevropa standarti boʻyicha 2 tadan savdo-servis majmuasini ishga tushirish muhimligi qayd etildi.

Shuningdek, M-39 magistral yoʻlining Jizzax hududidan oʻtgan 98 kilometr qismida yoʻlovchi va haydovchilarning xavfsiz harakatlanishi uchun sharoitlarni yaxshilash topshirildi.

Prezidentimiz qishloq xoʻjaligiga alohida eʼtibor qaratdi.

Viloyatdagi jami 900 ming gektar lalmi va yaylov yerlarining 110 ming gektari zaxirada turgani, ularda ozuqa, moyli ekinlar ekish va sanoat bogʻlarini yaratish orqali kamida 20 ming odamni ishli qilish mumkinligi taʼkidlandi.

Jizzaxdagi yaylovlardan samarali foydalanish boʻyicha uch yillik dastur ishlab chiqish topshirildi.

Shu bilan birga, keyingi yildan yaylovlarda yer egalari yuqori daromadli ekinlar ekib, yerdan maqsadli foydalansa, ularga yer soligʻi 2 karra kamaytirib beriladi.

Shuningdek, viloyatdagi koʻplab chorvador va fermerlar ozuqa va meva-sabzavot yetishtirishda suv nasosiga sarflangan elektr uchun subsidiyani har oyning boshida toʻlab berishni soʻragan.

Mutasaddilarga butun respublikada ushbu subsidiyalarni oy boshida beradigan tizim qilish muhim ekani koʻrsatib oʻtildi.