Assalomu alaykum, xalqaro maydonda yuz berayotgan voqea va hodisalarning qisqacha sharhi “Xalq soʻzi” va “Narodnoye slovo” gazetalarining tahliliy-informatsion dasturida

Rossiya Husiylarni qurollantirishi mumkin

Rossiya Yamandagi Husiylar harakatiga kemalarga qarshi ballistik qanotli raketalar yetkazib berishni koʻrib chiqmoqda.

Husiylar Qizil dengiz mintaqasida savdo va harbiy kemalarga hujum qilishi bilan tanilgan. Bunday qurollarga ega boʻlish mintaqada yanada keskinlikni oshirishi mumkin.

Eron bilan yaxshi munosabatda boʻlgan Husiylar Isroilning Gʻazodagi harakatlariga javoban uning kemalarini nishonga olib keladi. Bunday harakatlar ushbu yoʻnalishda dengiz qatnoviga taʼsir qilish bilan bir qatorda yuk tashish yoʻllarini himoya qilishga ham toʻsqinlik qiladi.

Moskvaning potensial aralashuvi Husiylarni Eron va boshqa kuchlarga qarshi qoʻyish uchun ishlatilishi mumkin. Guruh allaqachon Suriya va “Hizbulloh” orqali sotib olingan Rossiyada ishlab chiqarilgan raketalarga ega ekanligiga ishoniladi.

Xabar qilinishicha, Saudiya Arabistoni valiahd shahzodasi Muhammad bin Salmon Husiylarga yangi raketalar yuborish gʻoyasidan voz kechish uchun Putin bilan gaplashgan.

Ukrainadagi vaziyat

AQSHning urushni oʻrganish instituti tahlilchilariga koʻra, Rossiya keng koʻlamli hujumlardan koʻra, uzoq muddatli taktik operatsiyalarni maʼqul koʻrmoqda. Putin uchun urush qancha uzoq davom etsa, uning Ukraina hududlarini bosib olish imkoniyatlari shuncha oshaveradi.

Tahlilchilar Gʻarb Kiyevni tezroq qurollantirish kerakligini aytishmoqda. Zelenskiy ham Oq uyni tanqid qilib, AQSH qurollaridan Rossiyaning ayrim hududlarini nishonga olish haqidagi cheklovlari Ukrainaning muvaffaqiyatsizligiga sabab boʻlishi mumkin.

Qoʻshma Shtatlar rahbari esa saylovoldi targʻibotlari va birinchi debatdan keyingi tushkunliklar bilan kurashmoqda. Uning oilasi prezidentlik poygasini davom ettirishga ishonch bildirgan boʻlsa, Demokratik partiya esa boshqa nomzod topishni oʻylamoqda.

Sharqning “Osiyo NATOsi”

Koreya Xalq Demokratik Respublikasi uzoq masofali ikkita raketa sinovini oʻtkazdi. Maʼlumotlarga koʻra, Pxenyan ikkita ballistik raketa uchirdi: ulardan biri taxminan 600 kilometr masofani bosib oʻtgan, ikkinchisi esa taxminan 120 kilometr uzoqlikka borib tushgan. Kim Chen In ushbu harakatni AQSH, Janubiy Koreya va Yaponiyaning “Osiyo NATOsi”ni tuzishda ayblaganidan koʻp oʻtmay sodir boʻldi.

Janubiy Koreyaning “Yonhap” axborot agentligi xabariga koʻra, raketalar Janubiy Xvanxe provinsiyasidan uchirilgan. Seul harbiy maʼmuri Shimoliy Koreyaning ushbu harakatlari mintaqadagi tinchlikka tahdid solishini bildirib, AQSH bilan kuchli mudofaa pozitsiyasini saqlab qolishni maʼlum qilgan.

Raketa uchirilishi Shimoliy Koreyaning Janubiy Koreya, Yaponiya va AQSH oʻtkazayotgan qoʻshma harbiy mashgʻulotlaridan norozilik belgisi boʻlishi mumkin.

“Kim Chen In boshchiligidagi KXDR xalqaro sanksiyalarga qaramay, yadroviy quvvatga ega raketalarni ishlab chiqmoqda”, deyiladi xabarda.

Maʼlumot uchun aytish uchun mumkinki, “NATOning Osiyo versiyasi” rasman mavjud emas, ammo u haqidagi “mish-mish”lar urchigan. Bu ehtimoliy ittifoqqa AQSH bilan yaxshi aloqalarga ega Yaponiya, Janubiy Koreya, Avstraliya va Hindiston kabi mamlakatlar kirishi mumkin.

Avstraliya bosh vaziri Entoni Albaniz NATO sammitida ishtirok etish uchun Vashingtonga bormaslikka qaror qildi.

Albaniz 9-iyul kuni boshlanadigan NATOning 75 yillik yubiley sammitida “Hind-Tinch okeani toʻrtligi” aʼzolari sifatida Yaponiya, Janubiy Koreya va Yangi Zelandiyadagi hamkasblari bilan uchrashishi kutilgan edi. Biroq tadbirdan bir hafta oldin uning oʻrniga mudofaa vaziri Richard Marles tadbirda qatnashishi maʼlum qilindi.

Avstraliya hukumatining manbalari aytishicha, Entoni Albaniz sammit oldidan AQSH prezidenti Jo Bayden bilan ikki tomonlama uchrashuvni tasdiqlay olmaganidan keyin shunday qaror qabul qilingan. Ayni shu sabab Albaniz idorasi bosh vazirga sammitda qatnashmaslikni maslahat bergan.

Turkiyada migrantlarga qarshi namoyishlar boʻlib oʻtmoqda

Namoyishlarga suriyalik erkak 5 yoshli bolaga nisbatan zoʻravonlik harakatlari sodir etgani sabab boʻlgan. Hodisa tufayli mahalliy aholi suriyalik qochqinlarga tegishli doʻkon, uy va mashinalarni yoqib yubormoqda. Tartibsizliklar 30-iyun kuni tunda boshlangan edi.