Foto: Hasan PAYDOYEV — “Xalq soʻzi”

Poytaxtimizdagi Respublika Olimpiya zaxiralari kolleji hududida zamonaviy sharoitlarga ega yangi gandbol zali foydalanishga topshirildi.​

«Ipotekabank» homiyligi asosida barpo etilgan ushbu majmuaning qurilishi uchun 11 milliard soʻm sarflangan boʻlib, uning umumiy maydoni 1 100 kvadrat metrni tashkil etadi.

Majmuaning ochilish marosimiga Sportni rivojlantirish vaziri Adham Ikramov, vazir oʻrinbosari Shaxrullo Maxmudov, Oʻzbekiston Milliy olimpiya qoʻmitasi Bosh kotibi Oybek Kasimov, shuningdek, Oʻzbekiston gandbol federatsiyasi vakillari, sportchi yoshlar, murabbiylar hamda ommaviy axborot vositalari xodimlari jam boʻldi.​

Marosim avvalida sportni rivojlantirish vaziri Adham Ikramov hamda 20 yil ushbu dargohga rahbarlik qilgan sport faxriysi E.Giyazov soʻzga chiqib ushbu majmuaning foydalanishga topshirilishi bilan Oʻzbekiston gandboli tarixida yangi davr boshlanganini eʼtirof etdi. Tadbir davomida taniqli sanʼatkorlar oʻz chiqishlari bilan yigʻilganlarga xush kayfiyat ulashdi.

Shundan soʻng yosh gandbolchilarimiz yangi, zamonaviy maydonda oʻz mahoratlarini namoyish qilishdi. Oʻrtoqlik maqomida oʻtgan ochilish oʻyinida Respublika Olimpiya zaxiralari kolleji hamda Oʻzbekiston yoshlar terma jamoasi aʼzolari oʻzaro bahs olib borishdi.​

“Xalq soʻzi”.