Sirdaryo viloyatining Mirzaobod tumanida joylashgan sport maktabida Prezidentimiz tashabbusi bilan butun mamlakat bo‘ylab keng ko‘lamda o‘tkazilayotgan "Yangi O‘zbekiston Olimpiya cho‘qqilari" musobaqalarining taekvondo (WT) bo‘yicha mintaqaviy bahslari bo‘lib o‘tdi.

Tantanali ochilish marosimida Mirzaobod tumani hokimi Abdurahim Umarov, viloyat Sport boshqarmasi boshlig‘i Anvar Buranov, O‘zbekiston Milliy Olimpiya qo‘mitasining Sirdaryo viloyati bo‘limi ijrochi direktori Bahodurxo‘ja Eshonov, O‘zbekiston taekvondo (WT) assotsiatsiyasi hududiy bo‘limlari uchun mas’ul Husniddin Xo‘jamqulov, mutasaddi tashkilot rahbarlari, jamoatchilik vakillari hamda yosh sportchi va murabbiylar ishtirok etdi.

Bugungi mintaqaviy bosqichda viloyatning Sardoba, Oqoltin, Mirzaobod tumanlaridan 200 nafarga yaqin yoshlar 10 ta vazn toifasida "Sport maktablari" hamda "Sport klublari"dan kelgan sportchilar g‘oliblik uchun bellashdi.

Musobaqaning yakunida g‘olib va sovrindor sportchilar tantanali tarzda taqdirlandi hamda "Yangi O‘zbekiston Olimpiya cho‘qqilari" musobaqalarining viloyat bosqichiga yo‘llanmani qo‘lga kiritdi.