Сирдарё вилоятининг Мирзаобод туманида жойлашган спорт мактабида Президентимиз ташаббуси билан бутун мамлакат бўйлаб кенг кўламда ўтказилаётган "Янги Ўзбекистон Олимпия чўққилари" мусобақаларининг таэквондо (WТ) бўйича минтақавий баҳслари бўлиб ўтди.

Тантанали очилиш маросимида Мирзаобод тумани ҳокими Абдураҳим Умаров, вилоят Спорт бошқармаси бошлиғи Анвар Буранов, Ўзбекистон Миллий Олимпия қўмитасининг Сирдарё вилояти бўлими ижрочи директори Баҳодурхўжа Эшонов, Ўзбекистон таэквондо (WТ) ассоциацияси ҳудудий бўлимлари учун масъул Ҳусниддин Хўжамқулов, мутасадди ташкилот раҳбарлари, жамоатчилик вакиллари ҳамда ёш спортчи ва мураббийлар иштирок этди.

Бугунги минтақавий босқичда вилоятнинг Сардоба, Оқолтин, Мирзаобод туманларидан 200 нафарга яқин ёшлар 10 та вазн тоифасида "Спорт мактаблари" ҳамда "Спорт клублари"дан келган спортчилар ғолиблик учун беллашди.

Мусобақанинг якунида ғолиб ва совриндор спортчилар тантанали тарзда тақдирланди ҳамда "Янги Ўзбекистон Олимпия чўққилари" мусобақаларининг вилоят босқичига йўлланмани қўлга киритди.