Foto: “Xalq soʻzi”

Respublika shoshilinch tibbiy yordam ilmiy markazi Qashqadaryo filialida 2 nafar bemorda buyrak koʻchirib oʻtkazish amaliyoti muvaffaqiyatli amalga oshirildi.

Xususan, yakkabogʻlik 34 yoshli bemor ayolga opasining buyragi koʻchirib oʻtkazilgan boʻlsa, nishonlik 33 yoshli erkakka akasi donorlik qildi.

Murakkab jarrohlik amaliyoti Respublika shoshilinch tibbiy yordam ilmiy markazi hamda viloyatdagi malakali jarrohlar ishtirokida oʻtkazildi.

— Hozirgi kunda Qashqadaryo viloyati boʻyicha 450 dan ortiq bemorlar gemodializ muolajalarini oladi, — deydi Respublika shoshilinch tibbiy yordam ilmiy markazi Qashqadaryo filiali direktori Ravshan Toʻlakov. — Shundan 100 dan ortiq bemor hozirgi kunda buyrak transplantatsiyasi amaliyotiga muhtoj. Shu bois xodimlarimiz bilan bu ishni kelgusida Respublika shoshilinch tibbiy yordam ilmiy markazi Qashqadaryo filialida muntazam amalga oshirish boʻyicha ish olib borayapmiz.

Eʼtiborli jihati, ilgari juda qimmat narxda faqat xorijda oʻtkazib kelingan bunday jarrohlik amaliyoti endilikda Qashqadaryo viloyatidagi tibbiyot muassasalarida ham yuqori aniqlikda oʻtkazilmoqda. Shu kunga qadar viloyatda 5 nafar bemorda buyrak transplantatsiyasi amalga oshirildi va endilikda bu amaliyot doimiy ravishda oʻtkazib borilishi koʻzda tutilmoqda.

Jahongir BOYMURODOV, “Xalq soʻzi”.