Oliy Majlis Qonunchilik palatasining navbatdagi majlisida «Bola huquqlarining kafolatlarini taʼminlash tizimi yanada takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida»gi qonun loyihasi deputatlar tomonidan birinchi oʻqishda konseptual jihatdan koʻrib chiqildi.

Taʼkidlanganidek, qonun loyihasi bilan Jinoyat va Jinoyat-protsessual kodekslarga oʻzgartish va qoʻshimchalar kiritish taklif etilyapti. Yaʼni jinoyat qonunchiligida voyaga yetmaganlarga nisbatan insonparvarlikni kuchaytirish maqsadida ularni jinoiy javobgarlikka tortish yoshini oʻn uch yoshdan oʻn toʻrt yoshga koʻtarish, voyaga yetmaganlarning jinsiy daxlsizligiga qarshi jinoyatlar, xususan, Jinoyat kodeksining 128 va 129-moddalari sanksiyalarini kuchaytirish nazarda tutilmoqda.

Shuningdek, loyihaga voyaga yetmagan jabrlanuvchi yoki guvohni soʻroq qilishning umumiy davomiyligi kun davomida toʻrt soatdan oshmasligini belgilash, voyaga yetmagan jabrlanuvchi, guvoh, gumon qilinuvchi yoki ayblanuvchini soʻroq qilishda voyaga yetmagan shaxsning yoki uning qonuniy vakilining iltimosiga koʻra psixolog ishtirok etishini taʼminlashga qaratilgan normalar kiritilmoqda.

Qonun loyihasi deputatlar tomonidan birinchi oʻqishda qabul qilindi.