Bosh prokuratura huzuridagi Departamentning Angren shahar boʻlimi tomonidan DXX xodimlari bilan hamkorlikda oʻtkazilgan tezkor tadbirda, valyuta ayirboshlash bilan shugʻullanib kelgan A.N. jami 4 000 AQSH dollarini fuqaro M.A.ga 45,6 mln soʻmga sotgan vaqtida ashyoviy dalillar bilan ushlagan.

Xuddi shunday, Departamentning Marhamat tuman boʻlimi tomonidan DXX hamda IIB xodimlari bilan hamkorlikda oʻtkazilgan tezkor tadbirda, valyuta ayirboshlash bilan shugʻullanib kelgan I.M. jami 3 500 AQSH dollarini fuqaro D.A.ga 40 mln soʻmga sotgan vaqtida ushlanib, uning yonidan 5 200 AQSH dollari, 4 000 Rossiya rubli va 2 250 Qirgʻiz somi ashyoviy dalil sifatida olingan.

Departamentning Andijon viloyat boshqarmasi tomonidan IIB xodimlari bilan hamkorlikda Andijon shahrida oʻtkazilgan tadbirda esa, valyuta ayirboshlash bilan shugʻullanib kelgan Gʻ.N. jami 3 500 AQSH dollarini fuqaro G.M.ga 40 mln soʻmga sotgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki oʻtkazish) bilan jinoyat ishlari qoʻzgʻatilib, tergov harakatlari oʻtkazilmoqda.